Tualchhung beiseina Gauff la dam zel

Nilainia US Open khelh mek hmeichhe singles third round lut zingah home favourite Coco Gauff telin, sixth seed Gauff hian 6-3 6-2-in Russian Mirra Andreeva a hneh a, tleirawl pahnih inbeihnaah tualchhung nula a dingchang.
Gauff hian season khat chhunga grand slam tournament hnuhnungber khelh mek inbuatsaihna Washington leh Cincinnati lama hard court title a sualchhuah theih avangin US Open-ah pawh hian a chipuite’n a lakah beiseina sang tak an nghat mek a, Arthur Ashe Stadium-ah pawh tantu ngah lehin, kumin French Open lama a lo hneh tawh Russian tleirawl kum 16 mi lakah American kum 19 mi hian harsa lo takin hnehna a chang leh.
Mihang tleirawl Gauff hian 3-6 7-6(7) 6-1-a a chipui leh 2022 Australian Open runner-up ni bawk Danielle Collins hnehtu Belgian 32nd seed Elise Mertens a tum leh ang.
August thlatir lama Canadian Open kaltlanga tennis comeback rawn entir Caroline Wozniacki chuan Nilaini zan inkhel dangah amah tiat thuala tennis hmeichhe milian Petra Kvitova a hneh a; world number one Iga Swiatek a chak bawk.
Hlawhtling taka Canadian Open-a a kirleh hnu Montreal leh Cincinnati lama first round paltlang zo lo zui ta Wozniacki hian a comeback hnua a hnehna sualchhuah lian ber ni turin 11th seed Petra Kvitova lakah 7-5 7-6 (7-5) hnehna nen US Open third round a lut.
World number one hlui Wozniacki hian fa pahnih a hrin hnuin kum 2020 khan tennis khelh a chawlhsan zet a, tunhnaiah kirlehin, New York grand slam a khel leh thei chu kum 33 mi Dane hian a mangphan thin a taka lo chang a nih thu a sawi.
Wozniacki leh kum 33 mi ve bawk Czech Kvitova hi khelmuala inhmachhawn fo tawh niin, Arthur Ashe Stadium-a a elpui kumhlun a hneh hnuah US Open-a tum hnih final lut tawh Wozniacki hian mipui lawm pawh a hlawh hle a, 2018 Australian Open title a lak ve tawh belhchhah tura major title a beisei leh mekna kawngah world number 11 a hneh theih avangin inrintawkna sang zawk a neih ngei rin a ni.
Second round in-khel dangah top seed Iga Swiatek chuan a title kawl lai humhim turin hma a sawn leh hret a, Australian Daria Saville laka 6-3 6-4 hnehna changin, a Grand Slam title pangana tur a hnaih zel.
Polish world num-ber one Swiatek hian kum 2012 atanga intana hat-trick siamtu American Serena Williams hnu lama hmeichhe player-te zinga US Open title humhim leh thei hmasaber ni turin leirem a rap chho zel a, vawiinah Slovenia player Kaja Juvan nen last 16 luh an inchuh leh ang.
Second round in-khel dangah Kazakhstan fourth seed Elena Rybakina pawhin hah loin hnehna a chang a, hliam avanga a tumpui tur Australian nula Ajla Tomljanovic a inlan loh avangin walkover hmangin hnehna a chang.
Two-time Grand Slam winner leh 18th seed ni bawk Victoria Azarenka erawh Chinese Lin Zhu lakah 6-3 6-3-in a tlawm a, third round a inpal thleng zo lo.
World number 44 Zhu hian 6-3 6-3 bawka Swiss 15th seed Belinda Bencic vawtlatu British qualifier Lily Miyazaki a tum leh ang.
American tlang zingah Taylor Townsend telin, 19th seed Beatriz Haddad Maia of Brazil lakah 7-6 (7-1) 7-5 hnehna a chang nawlh a, 10th seed Karolina Muchova a tum leh ang.
Czech Muchova hian third round lut turin Poland nula Magdalena Frech lakah 6-3 6-3 hnehna a chang ve bawk.