Tualpui khawtlang chuan an khawchhuak Lalduhoma chu Zirtawpni khan chief minister a nih avanga lawmna leh chawimawina an buatsaih sak a. Taima leh tumruh apiangin sawrkar atanga hamthatna an huilut tam dawn tih a sawi.
Amah leh a chhungte siamlian a, a thlavang vawi tam hauha chawimawi thintu Tualpui khawtlang chungah a lawm tih Lalduhoma hian a sawi a. Lawmna leh leh chawimawina buatsaihtu Tualpui VC, Organising Committee, tlawmngai pawl, kohhran leh Tualpui Welfare chungah leh amah tawiawmtu minister, MLA, Board chairman leh sawrkar official-te chungah lawmthu a sawi bawk.
Chief minister hian School Education minister Vanlalthlana thilpek ‘smart board’ chu Tualpui High School hnenah a hlan a; Tualpui Primary leh Middle School building chu sakthat an nih tur thu sawiin, zirtirtu indaihlohna pawh phuhruk thuai an tum tih a sawi. Health minister Lalrinpuii aiawhin Tualpui Health & Wellness Center hnenah damdawi engemawzat a pe a. Tualpui khaw power lakluhna 11kV line thar siam nan P&E department hnuaiah cheng nuai 113.94 an ruahman tih a sawi bawk.
“Kan ramin hma a sawn theih nan theihtawp kan chhuah dawn a, a taima leh tumruh apiangten sawrkar atanga hamthatna awm theite an hui lut mai dawn a ni. Mipui leh sawrkar hnathawk zingah thil tha duh tam tak an awm tih kan hria a, kan ram hi thang leh thar lo awm zel tur tana chenna tlak leh ei leh bara intodelh turin theihtawp min chhuahpui turin mipui ka sawm a ni,” a ti.
Tualpui-in Duhoma chawimawi “Taima apiangin hui lut tam ang”
Get real time updates directly on you device, subscribe now.
Prev Post
Next Post