Tui dinhmun zirchianna centre din

Irrigation & Water Resources department-in State Hydro-Met Data Centre & Water Quality Laboratory an din chu Zirtawpni khan I&WR minister PC Vanlalruata’n a hawng.
Dinhmun zirchian hmasak loh chuan hmalak dan tur ruahman a har thin a. I&WR department kaltlangin National Hydrology Project hnuaiah Mizorama tui kan neih dan dinhmun lakkhawmna, ‘Real Time Data Acquisition Centre’ leh ‘Water Quality Laboratory’ hi din a ni tih minister hian a sawi. Hei hi hi I&WR bakah Agriculture, Horticulture, PHE, Mizoram State Pollution Control Board leh department dang pawhin hna thawh nan an hman tangkai a beisei tih a sawi a ni.
I&WR chief engineer Lalrothanga chuan lui tui luanluh leh chhuah dan dinhmun leh tui awm zat chhinchhiahna mumal tak Mizoramin a la neih loh avangin ruahmanna duan kawngah harsatna a awm thin a. State Hydro-Met Centre & Water Quality Laboratory hi kan rama tui kan neih dan dik tak hriatnan leh chu’ng data chu hman tangkai a nih theih nana hmanraw pawimawh a ni dawn tih a sawi.
Central sector scheme – National Hydrology Project (NHP) hi kum 2016 atang khan India ram pumah kalpui a ni a, Mizoram tan implementing agency chu Irrigation & Water Resources department a ni.
NHP hian thil tum lian tak a neih chu, India ram pumah water resources data rintlak lakkhawm a, awmze nei taka dahkhawm leh a hmang tangkai tur hnena pek a ni.
He Data Centre-ah hian technology thar ber ber hmangin tuna thleng mek (real time) data, lui tui luang zat, ruahsur zat, tui hu kal zat, boruak hnawn dan, thli thawt dan, khaw lum leh vawh dan, boruak nekna zat, ni sat dan leh lei hnuaia tui awm dan hriat theih a ni dawn a. Tunhmaa thleng tawh (historical) data pawh hmuh theih a ni. Kan tui neih zat dik tak leh a chetvel dan kan hriatchian chuan, a tul hunah domestic, agriculture leh industry atana tui insem dan tur ruahmanna mumal tak, data rintlak a innghat neih theih a ni dawn a ni.