Tui lakna khawl thar leina tur vbch.1.50 pe

Aizawl khawpui chawmtu tui lakna pui ber, Greater Aizawl Water Supply Scheme Phase-II a tui pump-na khawl pahnih zinga pakhat chhia thlakna tur, a thar leina cheng vaibelchhe 1.50 chu finance changtu chief minister chuan a pe.
PHE hotute sawi danin, kumin September 15 khan GAWSS-II a electric motor, kW 1700 vel chu a chhia a, siamthat lehna atan hian thla 6 tal a duh rin a ni. He khawl hian ni khatah tui litre maktaduai 8 vel a pump chhuak thin a, hetia a chhiat takah chuan khawl pakhat hmang chauhin tui hi pump theih a ni rih dawn a, tui lak hi zaa 30 vel a kiam phah dawn nia chhut a ni a, Aizawl khawpui tan tui hnianghnara hmuh a har rin a ni.
He khawl hi a upat deuh tawh avangin PHED hian a thar leina tur project siamin, Finance department lamah an lo dil tawh a, hnawlsak an ni tih an sawi.
Hetihlai hian finance changtu chief minister chuan he harsatna rang taka sutkian a nih theih nan khawl thar leh a kaihhnawih mamawh dang leina tur sum SASCI hnuai atangin vaibelchhe 1.50 a pe a ni.
Aizawl khawpui chawmtu tui pump khawl chhiat avanga mipui leh department thawktuten harsatna an tawk chu pawi a tih thu chief minister hian a sawi a. Mipui leh thawktute harsatna sutkian a nih thuai theih nan khawl thar leina tur chu a rang thei ang bera ngaihtuah nghal a nih thu leh, mipui harsatna pawh sutkian thuai a nih a beisei thu a sawi a ni.