TUI TLA KAN AWM LEH |HIN HI A PAWI MANG E!

JC.Zoremi Hmar Joute

Thleng ka sil mawlh mawlh a, DDK News-a an thu puan ka ngaithla pah a. Tv.Anthony Lalthlamuana Tlawng luia a tlâk hlum thu an rawn puang ta mai a, TV hmaah ka tlan phei vat a, mumang ni se ka ti a, mahse a tak ngei a ni si!
Ka thianpa, ka nau ni bawk, ka ngainat leh ngaih em em a ni. Ka thu leh hla te min tuipuiin naupang te e ti lo chuan a thiam tawkin min fuih ve thin. Han en mai chuan tumahin a va hmeltha em an ti hluai dawn lo; mahse a chhungril thatna hmu fuh tawh erawh chuan kan ngaina vek mai a ni. Kohhran leh khawtlanga mi tangkai, zuanzang leh tih nuam, a hria apiangte mittui ko chhuaktu mihlu a ni. Kan inhmuh hnuhnun berin Scarf hi min pe a, “Lo kawl tha tlat rawh aw,” a ti a, kei chuan, “Teh ngawt chuan,” ka ti a, ka nui hui a, “A la hlu dawn a nia aw,” a ti leh mai a, a thih tur hria ang hrimin! Ani chauh lo pawh tui tla an awm thu chanchinthar lamah puan a ni ta zeuh zeuh mai a, a pawiin a lungchhiatthlak tak zet a ni.
Tun hun. thâl lai hi picnic season a ni a, picnic spot hrang hrang pawh a lun hle mai. Picnic hian mi tin ka sahawk a, kan hlimin kan ri bual a, tui kan ngamin kan phusa nasa thin a, fimkhur a ngaih ber hun a ni tih kan hriat erawh a pawimawh em em mai. A bikin naupang kan ven uluk zual a ngai a ni.
Kan hma lawkah furpuiin min hmuak leh ta reng mai bawk a, mi tin kan fimkhur a tul leh dawn a ni. Khaw that lai, chhun ni sa pawh ni se, lui hnâr lamah ruah a sur chuan tui lian thut thut thei a ni. Naupang leh thalai, puitling tan pawh ramhnuai leh lui awmna lamah picnic emaw, intihlim tura kal loh a him ber a, tui thiam emaw, lui lam chanchin hre chiangtu emaw tel lo chuan kal loh mai kha a him ber a ni. Sabereka khuang kaih kan tih ang chi te hi a hlauhawm em em mai a, ruahtui tlak tirh lamah hian a thleng duh em em. Tui thiam tel lo chuan lui lama kal loh mai a him ber ang. Tui tla an awm changa ka pa sawi thin ka la hre reng mai; ka’n hrilh ve ang che u.
1. Mâu Pûm
Mâu pûm hmanga lui lian i inkar kâi dawn a nih chuan Mâu pûm kha uluk taka tuk a ngai. A bikin Tlawng lui lian ang chi hi chu ni khat emaw, zan khat emaw han nghak ila a kâm leh duak thin a; tui lian chu a len vanglai chuan hleuh kâi tum lo tingtang ila a tha ber mai. Sawi tawh angin loh theih loh thila kan inkar kài a tul ngang a nih chuan Mâu pûm chu uluk taka tuk ngei ngei tur a ni. A theih chuan Bike tube emaw, ham puar theih chi eng thil emaw ber ken hram hram tur. Mâu pûmah i chuang a nih chuan eng ang khawpa suar khawkrawkah pawh lên lût che se la Pûm thlah ngai reng reng suh. Tui lian nasaah chuan patling meuh tan pawh zàm chhiat mai a awl em em a, Pûm atanga zuan thlâk hauh loh tur.
2. Pûm a awm loh chuan:
Tui bottle, cocacola bur emaw, sprite ûm lian chi emaw, plastic ûm ruak hrim hrim hi pali panga tal ken ngei ngei tur. Chu’ng bottle ruak chu tawn khawm ila, zak hnuaiah han chep ila kan pil thei miah lo. Mâu pûm a awm loha tui hleuh dawn chuan nghet takin chhîn la, pahnih atanga pali vel a ring rêka phuar khawm a, zak zeh mai tur. I thâwkna tur khawp a tilâng dawn che a ni. Pil loh a pawimawh ber a, chuvangin bottle ruak chu ken ngei ngei a tha. Hlau lo la, tui lianin a lèn zel ang che a, vâu kamah a len chhuak thuai mai ang che.
3. Bottle ruak kan lo pãi remchang lo a nih chuan:
Bottle ruak i nei lo a nih chuan Mâu bung, châng nei, châng thum emaw, châng li emaw, lui kama i hmuh theih ang ang kha lak khawm tur a ni. Mâu pûmah i chuang dawn emaw, i hleuh dawn a nih chuan chung mau bung chu zakzeh rawh; hei hian i thâwk theihna khawpin a tilâng dawn che a ni. Tui lian i hleuh dawn chuan khing kan sawi tak bottle ruak emaw, Mâu bung emaw nei lo chuan hleuh ngawt suh; i nei a nih erawh chuan i taksa depah kuah/zep tlat la, nangmaha hleuh kai phêt tum lo la, hlau miah lovin tui inlentir la, vâu kamah a lên chhuak thuai mai ang che.
4. Tui lian chu engtia hmachhawn tur nge:
Duhthusamah chuan Mâu pûm hi tui liana inkar kai nan chuan a tha ber. A dawtah chuan bladder ham puar bawh tlat mai hi a ni. Heng hi kan nei remchang lo a nih chuan kan sawi tak Mâu lian thelh thawlh tlâwn khat emaw, châng hnih khat lek emaw pawh bawha vawn tlat kha a ni leh mai. Heng ho tel lo hi chuan tui lian chu a dai pawh dai chhin loh law law mai tur. Heng kan sawi tak te hmanga tui lian kan dai kai dawn a nih chuan hleuh tum loh tur a ni a, heng kan sawi tak te hi thlah reng reng loh tur a ni. Hleuh phêt tum lovin tui lian kha inlentir diai diai mai tur a ni a, vâu kamah min len chhuak vat mai a ni tih kan sawi tawh kha, Lui lai tak hlirah inlentir pawh tum mah ila a theih loh reng reng; vâu kamah min len chhuak vat ngei ngei. Hlauh tur a ni lo va, inbual ang lekah inngaih luih tlat tur.
5. Tuiah i tla palh a nih chuan:
Vanduaithlak taka tuia i tla palh a nih chuan chi-ai loh tum hram hram rawh(hei hi thil harsa ber pawl a ni) I thaw kha han hîp vak la, i chuapah boruak dah khat rawh. I thâwk loh chhung chu i pil dawn lo; i thaw zawk ang a, thaw lovin i awm leh vang vang thin ang. Chumi chhung chuan luia mau bung emaw, thil lâng thei chi reng reng, luiin a rawn len kha i lo melh ran mai dawn a ni. Inhâi buan buan loh tur, i tâl buai nghal a ni mai. Pasaltha tan meuh pawh hlauh luatah rilru fim put a harsa em em mai a, a theih hram chuan chi-ai loh tum tlat ang che. Luia thil lâng, mau bung emaw i hmuh phawt chuan vawn tlat tur, hleuh tum reng reng suh ang che, tui inlentir la, reiloteah vau kamah a lèn chhuak mai ang che. Kan chuapa boruak kan hip khah hian kan pil thei miah lo tih hi hriat khiau tur, boruak i thâwk chhuah veleh i pil nghal ang. Inhâi chhuak vak la, thaw han la zawk la, châwl leh thin la, vanneih chuan hemi chhung pawh hian vau kam kan kâi hlauh thei a, hleuh buai duh loh tur, i chau nghal mai ang.
6. Vuan suh:
Tui i tla palh a, tuin emaw a rawn chhanchhuak dawn che a nih chuan nangmah zawkin lo vuan reng reng suh. Lipui zau lai a nih phei chuan tui hleuh hi a hahthlak em em mai a, i lo vawn chuan in che buai zawk thei. A hah avangin i chhip samah emaw thâwk i lâk zeuh zeuh theih nan a khai kang zeuh zeuh thei chauh ang che. Kan ram tui te hi tuifinriat tui nen a inang lova, mihring kan pil hma bik em em a ni.
A pawimawh ber chu fimkhur hi a ni. Tui thiam leh puitling rem hre deuh tel lo chuan tun lai angah hi chuan ram kal mai mai loh tur. Mâu bung, Pûm leh bottle ruak, tuia min tilâng thei chi tel lo chuan eng lui mah hi dai kai tum loh phawt tur. Eng pawh ni se luipui lianah i tâl buai a nih chuan hleuh tingtang lovin tui luan dan ang anga inlentir tur, vau kamah min vawrh chhuak thuai mai.