Tuialhthei hnianghnar thei rih lo
Kawng chhiat vangin tun hnaiah Mizoramin tuialhthei lamah harsatna a tawk a, hman tur chu awm mah se a tam thei lo.
Filling station hrang hrangin an ngah thei lo; a thleng a awm zeuhin a zo leh nghal a ni mai a, chutiang chuan an kal naw naw a ni ber.
Mizoram Oil Tanker Drivers Association hruaitute chuan tuialhthei lama harsatna hi kawng chhiat vang a nih thu an sawi a, a phur tur awm mah se kawngah an thang rei thin avangin filling station-ah a tam thei lo tih an sawi.
Khamrang leh Kawnpui inkar kawng chhia chu an mutan a nih thu an sawi a, a phur tura kal tanker ruak pawh Khamrang leh Kawnpui inkarah ni hnih te an thang thin avangin tuialhthei hi an phurh zung zung thei lo tih an sawi.
A hma chuan phai atanga tuialhthei latu tanker 50 te’n ni khatah Vairengte-ah challan an la thin a, July ni 30 khan tanker 17 chauhin challan an la tih an sawi. Kawng a chhiat avangin an tlan zung zung thei lo a, tuialhthei phurtu an indaih thei lo tih an sawi. Kawng chhiaa an tlan avangin lirtheiin a tuar a, siam a ngaih thin avangin lirthei indaih lohna a awm tih an sawi bawk.
Filling Station neitute pawhin tuialthei a thlen mumal loh thu, he harsatna hi thla hmasa lama intan tawh a nih thu an sawi a, kawng a chhiat avanga a phurtute an thang rei thin chu he harsatna bul a nih thu an sawi.
North East Petroleum Mazdoor Union te’n kawng a chhiat em avangin August thla atangin Mizoramah tuialhthei phurh luh an remtih dawn loh thu an puang a, hemi chungchangah hian filling station neitute chuan he pawlin rem an tih loh chuan keini’n kan phur ngam alawm ti mah ila awmzia a awm lo ang an ti.
Mizoramah filling station 110 vel a awm a, a tam ber 70 vel chuan IOCL hnen atangin an la. IOCL hnen atanga late hian Silchar leh Guwahati-a mi an la a, BPCL hnen atanga late’n Guwahati atanga km 265 vela hla Numaligarh-a mi, HPCL hnen atanga late’n Guwahati-a mi an la.
Hetih lai hian petrol leh diesel hi black market-ah chuan lei tur a awm reng a, petrol hi litre 1 tling lo Rs 150 vela lei tur a awm. Silchar vela mi motor te chiin an la thin nia hriat a ni.