Tuialhthei man a pung mek

Indo vangin khawvelin tuialhthei lamah harsatna a tawk mek. India pawh a nghawng a, Mizoramah pawh tunlaiin tuialhthei man a pung.
A hma chuan Aizawlah petrol litre 1 Rs 99.15 man a ni a, XP Rs 107.79, diesel Rs 87.97 man a ni. May ni 25-ah tun hnaia a vawi thum nan tuialhthei man a pung a, petrol litre-ah Rs 106.39 man, XP Rs 115.03 man, diesel Rs 95.07 man a ni.
Tun hnaiah May ni 19-ah tuialhthei man hi a pung a, May ni 23 leh May ni 25-ahte a pung leh. A pung zel dawn em tih hriat a ni lo a, pung tura ngaih chu a ni.
Aizawla filling station (petrol pump) enkawltute chuan tuialhthei hi a vang lo a, a man hi pung mah se a vang lo, an laknaah lak tur a awm reng tih an sawi.
Silchar bul Moinarbond atanga la thinte phei chuan a hma aiin lak a awl zawk tih an sawi; an sawi danin, a hma chuan ni khatah challan pakhat zel siam an phal avangin petrol an lak chuan petrol chauh an la thei a, a dang lak an phal lo. Tunah chuan ni khatah petrol leh dieseal pawh ni khata lak ve ve an phal tioh an sawi.
Aizawlah tuialhthei inchuh a awm rih lo nia an hriat thu an sawi hlawm a, a lun thu-ah chuan a hma pawhin an lun reng a, a ngai reng a la ni tih an sawi. Tun hnaiah sorkarin inrenchem thu a sawi tirhah khan an pung deuh nia a lan thu leh, chu pawh a nasat zui loh thu te an sawi bawk.
USA leh Israel tang dunin Iran an do a, hei hian tuialhthei bakah aluminium leh fertilizer lama sumdawnnaah khawvel hmun hrang hrangah harsatna a thlen a ni.
Tuialthei man pun dan
Petrol XP Diesel
A hmain Rs 99.15 Rs 107.79 Rs 87.97
May 19 Rs 102.9 Rs 111.61 Rs 91.65
May 23 Rs 103.82 Rs 112.46 Rs 92.51
May 25 Rs 106.39 Rs 115.03 Rs 95.07