Tuichangral chak hlawkpuitu TNT

Tuichangral chak hlawkpuitu TNT
Hmahruaitu Tuichangralin set an hloh hmasak hnuah Sihphir beiseina an dang chat a, inrinni zan Pro Volleyball mipa league kharnaah set thum set khata an chak rualin Thutak Nunpuitu Team-in semi-final hmun ruak hnuhnung ber an hnawh khat.
LPS Arena, Falkland-ah knockout round luh tumin Sihphirin set khatna la nghal mah se an tum ram an thleng pha lo chiah a, set hnihna atangin Rajneesh Singh chuan Tuichangral fuih phurin 21-25, 25-16, 25-21, 25-21-in an chak.
Vawi nga theuh an khelhah Sihphir leh TNT an intluk hle a, tum hnih ve ve chakin set an lak zat leh hloh zat a inang.
An pahniha an inkhel tumin Sihphir an chak zawk avangin live programme-ah semifinal lut anga puan ni mah se technical thilah hriat sual palh a awm a, Hunthar nen an tlang zo ta lo a ni.
Hmeichhe khelh dan angin league-ah point 15 game, set nga khel turin Pro Volleyball dan bu tihchhuah a ni a, point inang hmu club pahnih an awm a nih chuan an pahniha an inkhelh tuma a chak zawk an sang ang tih a ni.
Mahse, a hnuah mipa club paruk inthurualin best of 5, point 25 game hmanga khelh an duh vek a; Organising Committee-in a pawmpui.
Hetah hian International Volleyball Federation dan hmangin point inang hmu club pahnih an awm a nih chuan set an lak leh hloh dan en hmasak ber tur a ni a, a la inan chuan an inkhelh chhunga point an hmuh leh hloh dan en lehin, a la inan fo chuan an pahnih inkhela chak zawk an chungnung ang.
Point an hmuh leh hloh zawng zawng atangin Sihphirin point ration 0.965 an nei a, TNT-in 0.987 nei ve thungin an sang hret a, Tuichangral, Khawbel leh Anastasia Electric Veng zuiin semifinal an lut ta zawk a ni.
Pro Volleyball-a an tel vawi khatnaah Sihphirin semifinal an hnaih hle a, Niyas Abdul Salam chuan vawi 26 vaw tlain point 14 a hloh a, a khelh hnuhnun ber TNT an hneh tum nena khaikhinin a tla hniam viau. Lalhmunmawia (Mapuia) chuan tum kua hlap tlain point nga a paih a, Albert Zothankuma’n point sarih hmuin point hnih a hloh.
Tlang chiang sa tawh mah se inthlahdah lovin Tuichangral tlo tluan a, Rajneesh chuan point 33 hmuin 14 a hloh a, Kuriz Player of the Match-a thlan a ni. Zomuansanga’n vawi li tisualin tum 14 a hlap tla a, Johan Vanneihsanga’n vawi 13 vaw tlain point ruk a hloh ve thung a, kawng hrang hranga khaikhinin Sihphirin an tluk lo deuh.
Chutih rualin phurna sang tak nen nung takin Sihphirin bul an tan a, Mapuia, Thangminlal Guite leh Niyas chuan point hmu zawn chhovin 16-12-in an sang nghal. Tuichangralin 21-20-a an hnaih chilh hnuah Niyas chuan vaw tla zawnin an kalsan leh a, Zomuana’n khaw chhak team tan point khat a hmuh belh leh na a, Rajneesh chuan point hloh zawnin Sihphirin set an lak theih nan Thanga’n a vuak a dan tlaksak.
Set lak belh se Sihphir an tlang dawn a, chuti a nih loh pawhin set tinah point an hmu tha zui viau a nih chuan TNT aia sangah an awm thei bawk. Mahse, set hnihna atangin Tuichangral an insiam rem a, Rajneesh bakah Zomuana leh Johana’n inkhel boruak tidanglamin 19-10-in hma an hruai.
Sihphirin point hmuh an harsat a, 22-16-a hniam zawk an nih hnuah Niyas chuan point thum a hloh zawn a ni. Inthlau taka set hnihna an hloh hi an tan a pawi zui a, set thumnaah hma lam pan zawngin insiam tha hret mah se Tuichangral an hawi kir tawh lo.
19-19 a nih laiin setter C Zonunmawia’n point a hlawh chhuak a, khaw chhak team-in kawng dik zawh chhunzawmin Rajneesh chuan net chungah tum hnih Niyas a dang a, Sihphirin point hnih chauh an hmuh belh laiin set an la zawn.
Set linaah pawh a tir atangin Sihphirin an um a, a tawp lamah Rajneesh-a hlap tum hnih dan zawnsakin 20-19-in an hnaih leh hman.
A tihsual siam thain Uttar Pradesh player chuan tum hnih a vaw tla zawn a, Niyas chuan hlap sual ve thungin point liin Tuichangral an sang zui a, point hnih neih belh chiah an mamawh tawh.
Albert-a’n a vuak tlak rualin Sihphirin point hnih an hmu zawn ve leh a, pawhthlak tuma beiseina an neih lai takin H Lalruatsanga’n a service dik lo. Tuichangral captain Zomuana’n hrem zuiin chiang takin a vaw tla a, 25-21 ve vea set thumna leh lina an lak zawn hnuah league-a sang ber ni chungin khelmual an chhuahsan.
Tuichangral hian semifinal hmasa zawk May 20 zanah league-a palina leh an hneh tawh TNT an hmachhawn dawn a, a tuk zanah pahnihna Khawbel leh pathumna Anastasia-in final luh an inchuh ve leh ang.

FIXTURE

MAY 19, 2025 (THAWHTANNI) – 8:00 PM
Jimmy Kanan v Luangmual (hmeichhia)

SEMIFINAL (MIPA)

MAY 20, 2025 (THAWHLEHNI) – 8:00 PM
Tuichangral v TNT Team

MAY 21, 2025 (NILAINI) – 8:00 PM
Khawbel v Anastasia Electric Veng