Tuichangral hnehtu Anastasia Electric Veng

Tuichangral hnehtu Anastasia Electric Veng
Kuriz Player of the match atana thlan Yougank Baliyan chuan amah an sawiselna chhangletin Anastasia Electric Veng a fuih phur a, Thawhtanni zan EverHome Pro Volleyball League-ah set thum set khatin Tuichangral an hneh.
LPS Arena, Falkland-ah set hloh hmasa Anastasia-in tha takin an beilet a, Gujarat atanga an lakluh Yougank bakah Laldensanga leh Laldinsanga’n hnehna kawngah team hruaiin 18-25, 25-21, 25-23, 25-18-in an chak.
May ni 9, 2019 khan league round hnuhnung berah Electric Veng club-in Thutak Nunpuitu Team an hneh a, tun hi Pro Volleyball inkhela an chak leh hmasak ber niin, kum ruk dawn hnuah anni aia rin hlawh Tuichangral lakah Yougank chuan vawi 29 vaw tlain point kua a hloh a, Kuriz Player of the Match-a thlan a ni.
League bul an tannaah set thum set khatin Sihphir lakah Anastasia an tlawm a, hliam nei chunga khel Yougank chuan point nga hmuin point nga tho a paih a, an sawisel zui hle. Densanga’n fel fai takin a khel chhunzawm a, point khat hlohin tum 12 a hlap tla a, player huaisen Dinsanga’n point 12 hmuin vawi nga a tisual.
League round hnihna zawh rualin Anastasia-in boruak thar hipin hnehna pawimawh tak an thawk chhuak a, Ningani zanah anni ang bawka an khelh hnuhnun bera chetha TNT nen an intawng dawn.
Tuichangral erawh a vawikhatna’na champion an tumna a tlahniam a, insiamthat mamawh chungin khelh hnih chak zawn awmchhun Khawbel nen zaninah an inkhel ang.
Set an hloh hmasak hnua TNT hneh tawh Tuichangralin harsa loin set khatna an la a, chak zui mai tura ngaih an nih laiin team pumpui an hnungtawlh. Set thumnaah 20-14-a sang zawk an nih hnuah Anastasia-in an pawt thla a, intel ruh zui thei loin an talbuai tluan.
Rajneesh Singh chuan point 28 hmuin 11 a hloh a; Johan Vanneihsanga’n tum 18 hlap tlain 11 a paih bawk a; Zomuansanga’n beisei pha lo zui zelin tum 11 vaw tla mah se point 10 a hloh.
An player langsarte’n point an hloh tam a, R. Vanlalmawia’n tihsual nei loin point nga hmu mah se team a chawi kang zo lo.
Inhliam Lalbiakmuana tel loin Tuichangralin an khel a, set hmasa berah Rajneesh chuan danglamna siamin a vuak tlak hnuah 21-18-in hma an hruai. Uttar Pradesh player hian tha takin a service zui a, Anastasia-in vawi li la thei lo zawnin Tuichangral an tlang.
Set an hloh hnuah hriam zawkin Electric Veng team-in taima taka anmahni auphur tlattute beiseina an tihlawhtling a; Dinsanga’n a vuak tlak rualin 15-11-in an sang.
Lehlamin tihsual an chin bakah hlap tlak an harsat a, Densanga leh Yougank chuan vaw tla zawnin 19-14-in hma an hruai zui leh a, point lia inthlauin set an la.
Set thumnaah kirleh tumin khaw chhak team-in a tir atangin hma an hruai a; Johan Vanneihsanga’n a ball hmuh point-ah chantir zawn chhoin Rajneesh chuan tha taka a service hnuah 20-14-in an sang fal hman a, mahse, Anastasia-in chak duhna an neih nasatzia lantirin point sarih an hmu zawn a, 21-20-in an lehpel.
Zomuana’n a vuak sual hnuah Yougank chuan hlap tlain 24-21-in Anastasia an sang zui leh a; Rajneesh leh Johana’n vawikhat ve ve dang mah se Lalrinawma’n net chungah chiang takin Rajneesh-a vuak a dan thlaksak a, Electric Veng team-in set an la zawn.
Set lina tir lamah inhnektawk viau mah se 9-9 atangin Anastasia-in an kalsan a, Densanga’n a vuak tlak rualin 17-11-in an sang.
Tuichangralin 17-19-in an hnaih leh na a, inelna sangah an paukhauh tawk lo a, Anastasia tan Yougank a rin tlak telh telh ve thung a, 24-18 a nih hnuah inkhel a titawp a ni.
Nizan result tarlan hman lohah Hunthar leh Sihphir an intum a, tarlan tawh angin, zaninah Tuichangral leh Khawbel inhmachhawnin, naktuk, Ningani zanah Thutak Nunpuitu Team leh Anastasia Electric Veng an intum ve leh ang.