Tuidam-Darlak kawng siamnasum tam zawk dah belh phut

Tuidam leh Darlak inkar kawng a chhiat tawh em avangin a siamthatna atan sawrkar chu tuna a ruahman aia tam dah belh turin an phut tih MNF chuan an sawi.
Hachhek MNF Joint Block thuchhuak chuan, he kawng chhia avanga khawthlang mipui bakah Mizoram pumin rei tak an tuar tawh a. Hachhek bialtu MLA Pu Robert Romawia Royte chuan a hmuna a en hnuah Mizoram sawrkar, Ministry of Road Transport & Highways leh larsap thlengin siamthat thuai a nih theihnan hma la turin a ngen tih a sawi.
Larsap-in chet a lak hnuah PWD minister Pu Vanlalhlana’n a hmuna a tlawh chu lawmawm an tih rualin, a hma daih atanga PWD hotuten an sawi tawh, cheng nuai 20 chauh bawk a rawn puang erawh mipui a tilunghnur hle, tiin, he sum hi PWD-in nuai 20 an ruahman an tih tho kha a nih phei chuan a zia lo hle tih a sawi a ni.
‘ZPM sawrkarin Vantawng bula ropeway siamna atan cheng nuai 3450 dahin, Thenzawl khawpui DPR siam manah cheng nuai 1000 a ruahman bawk lai a, state pahnih inkalpawhna kawng awmchhun chhe lutuk siamna atan cheng nuai 20 chauh a ruahman hi mak a ni,’ thuchhuah chuan a ti.
He kawng hi state PWD mawhphurhna liau liau a nih angin, midang puhmawh loin, sum tam zawk hmanga rang taka siamtha thuai turin PWD minister leh sawrkar an phut tih a sawi a ni.