Tuidam kawng siam turin inpeih Fur ruahtui tlak tlem deuh nghak – ZPM Thalai

Darlak leh Tuidam inkar kawngpui chhia siamtha turin sawrkar chuan sum a ruahman fel tawh a, fur ruahtui a tlak tlem deuh veleh siamthat nghal tum a ni tih ZPM Thalai chuan an sawi.
ZPM Thalai Hqrs. thuchhuak chuan, Darlak leh Tuidam inkar kawng hi Ministry of Road Transport & Highways (MoRTH) hnuai ami, NH-44A/108 a ni a. He kawng siam tur hian contractor atan M/s Gayatri Project Limited thlan a ni. Hnathawh muan avang leh hna a that tawk loh avangin 2023 August 24 khan an contract tih tawp sak a ni a. He kawngpuia hna thawh tur la awm (balance work) thawh zawhna tur hian estimate siamthat niin, sum sen tur dilna cheng vaibelchhe 169.75 chu MoRTH-ah a thang mek tih a sawi.
Tuidam kawng hlui cheithat nan, One Time Improvement Estimate vaibelchhe 4.89 chu ministry-ah hian thehluh tel a ni tih sawi bawkin, hei pawh hi sanction nghah mek a ni tih a sawi a ni.
Ministry-a estimate thehluh sanction nghah chhung hian kawng chhe zual cheina turin PWD minister Pu Vanlalhlana’n theihtawp chhuahin, Tuidam Approach Road resurfacing tih nan cheng nuai 101.90 ruahman a ni a, administrative approval leh expenditure sanction pawh a chhuak tawh. Fur ruahtui tlak zawh ve leha black topping hna thawk turin ruahman a ni tih a sawi.
‘Kum dang aia ruahtui tla a tam avangin duh angin hna a chak theilo a, chuti chung chuan PWD minister hian theihtawp chhuahin, fur ruahtui tlak laia a theih ang anga kawng enkawl turin exacavator pahnih duty dah a ni a. Kawng khuar zualpui pawh boulder hmanga a remchan ang anga hnawh thin a ni. Kumin hian ruah bawhawk a sur tamin leiminin PWD a tihbuai em em karah a pawimawhna hria in sawrkar chuan a thei anga hma lak zel a tum a ni,’ ZPM Thalai thuchhuah chuan a ti.