Tuihna humhalh lamah CYMA leh PHE thawhdun zel an tum
PHE minister Prof. Lalnilawma chuan Nilaini khan Central YMA hruaitute lengah sawmin tuihna humhalh leh faina kawnga thawh dun chungchang a sawipui.
Minister chuan tuihna humhalh leh faina kawngah Central YMA leh an department tha taka an lo thawhdun tawh chu chhawmnun zel a tul tih a sawi a. hemi kawngah hian nasa lehzuala tan laka intawiawm tawn a pawimawh, tiin, thurawn inpek leh harsatna thlen kawngah inthlahrung lo turin a chah.
Central YMA president Lalhmachhuana chuan PHE department chu thawhpui nuam an tih thu a sawi a. YMA inkhawmpui lian vawi 74-na Biate-a neihah tuihna humhalh kawngah tun aia nasa zawka hma lak a rel tih sawiin, bawhzui a nih dan a sawi. Tuihna humhalh leh faina kawngah YMA chuan tha taka sawrkar a thawhpui zel tur thu a sawi bawk.
Tuihna humhalh leh faina kawnga hma lak tlan dan thlirho niin, tuilakna lui leh a kama awm tuihna siamtu thing leh mau an chereu mai loh nan humhalh tura tan lak a tul thu leh hmalak dan tur sawiho a ni. Luidung tibawlhhlawhtu hnawmhnawk thianfaia faina kawnga hma lak a tul thu pawh sawi niin, faina hnatlangpui buatsaih nise an ti.
Sawrkar scheme pawimawh, Jal Jeevan Mission (JJM) leh a dangte kaltlangin tuilakna leh in tin thleng pha tui pekna siam ni mah se, tui herhhaw mai tur a awm leh si loh chuan hmasawnna ruhrel siamten awmzia a neih dawn loh avangin, tuihna humhalh leh a siam theitu tihpun kawngah ngaihtuahna sen tlan a tul tih an sawi bawk.
PHE secretary Er F Liantluanga hoin department hotute leh, Central YMA OB bakah CYMA hnuaia Science & Environment Sub-Committee member-te an tel a ni.
PHE leh Central YMA hian kum 2012 atang khan ‘Kan rama tuihna humhalh leh a awmsa tihpun’ tih thiltuma neiin thawhdunna thuthlung an ziak a, hemi hnu hian thawhdunna thuthlung chhunzawmna tum hnih ziah a ni leh tawh. Tuna thawhdunna kalpui mek hi 2021 October 28 khan ziah niin, kum 4 chhung, 2021- 2025 thleng a awh dawn a, a zawh hnuah a tul anga ennawn leh tura tih a ni. Kum 2017 atang khan tuihna humhalh bakah faina kawngah pawh an thawkdun tel a ni.