Matatila tuikhuah, Shivpuri district, Madhya Pradesh-a lawngleng chesuala thi ruang paruk chu Nilaini khan hmuh an ni tih thuneituten an sawi a, an zinga pathum hi naupang niin tleirawl pakhat zawn zui mek a ni bawk tih police-in an sawi.
Chhiatna hi Thawhlehni zana thleng kha niin mi 15 phur lawngleng, Matatila tuikhuaha thliarkara awm temple pan hi a chesual a ni.
Mi pariat chu a bul hnai khuaa chengte puihna nen chhanchhuah hman ni mah se mi dang pasarih chu tuiah hian an tla a, an chin hriat loh niin nasa taka zawn zui a ni tih police chuan an sawi.
Pichhore-a Sub Divisional Officer of Police (SDOP) Prashant Sharma chuan chhanchhuah hna hi tlaivara thawh a ni tih a sawi a, ruangte hi Nilaini chawhnu thlenga hmuh chin a nih thu a sawi.
Tleirawl kum 15 mi, Kumkum-i an tih chu an la zawng mek zel a. Ruang hmuhte hi Kanha (7), Shiva (8), Chayna (14), Ramdevi (35), Leela (40) leh Sharda (55) te an ni tih a sawi bawk.
Chhanchhuah zinga mi, Ramdevi-i chuan an lawng mawng atangin tui a lut a, nasa taka insawiin insiam remna hman pawh awm lovin an let zui niin PTI hnenah a sawi.
Engtin nge a inhleuh tih pawh a hriat loh thu leh nasa taka a inhai vak vak thu a sawi a, lawngleng dang chu a hun taka thlengin an chhan him ta niin a sawi.
Chhiatna thlenna hmuna thuthar lakhawmtuten an kawmnaah Shivpuri District Collector Ravindra Kumar Chaudhary chuan chetsualna a thlen rualin chhanchhuah hna thawktute an che chhuak nghal a, zankhuaa an beih hnuah Nilainiah ruangte chu an hmu chauh thung tih a sawi.
“Tuikhuaha awm thliarkara temple-ah hian tawngtai turin mi an kal fo va, Holi leh Rang Panchmi laiin kal an tam zual thin,” a ti.
“Tuna lawngleng chesual ta hi a te a, thinga siam a ni bawk a. Lawnga tui a luh emaw, a inbuk tawk loh emaw hlek hian chetsual a awm bik em em a ni,” a ti.
Thuneitute chuan hetiang chhiatna hi a thlen tawh lohna turin hma an la nghal dawn tih collector chuan a sawi bawk.
Thawhlehni zan khan Chief Minister Mohan Yadav-a chuan thite hi Rs nuai hnih theuhva ral an nih tur thu a puang.
Tuikhuaha lawng chesuala thi ruang paruk hmu tawh
Get real time updates directly on you device, subscribe now.