Tuikhuahna tur chhehvel ‘freeze’

Sawrkarin hydroelectricity project ruahman a tumna lui chhehvelah compensation beisei vanga ram inneihsiak ang chi a awm tawh lohna turin Mizoram sawrkar chuan ram lei leh hralh theih rih loh turin dan tlawhchhan hmangin a ‘freeze’ vek tih power minister chuan tunhnai khan a sawi a.
North Lungleng bula Tlawng lui chu hydroelectricity project siam nan ruahman mek a ni a, 2025 laihawl velah DPR siam peih hman beisei a ni. Lui khuah tur chhehvelah LSC leh periodic patta inpek theih loh turin an sawrkar hnuah dan siam that a nih thu power minister hian a sawi a. Compensation-in kan rilru a hruai sual thui tawh a, tuna hydel project ruahman tumnaah hi chuan miin ram a neih thar thut theih lohna turin ‘freeze’ vek a ni, tiin a sawi a ni.
Zangnadawmna chungchangah hian, hruaitu hlui pakhat chuan Mizote hi ‘compensation hnam’ ti hialin a hmehbel a. Hei hi a chhan chu, Mizoramin hmasawnna ruhrel liantham (asset) a din dawn apiangin compensation ngiatna boruakin hmasawnna hna thawh a tibuai rei thei hle a, a nihna tur angin hna thawh a nih theih loh phah thin a, a chang chuan project kal lai chawlhsan hial a ngai thin. Inkalpawhna kawngpui a ni emaw, kawlphetha siamna tur tuikhuah a ni emaw, compensation ngiatna boruakin hna kal lai a tikhaihlak ngei ngei thin. Hei hi chu sawi duah ngai lovin a taka tawngtu, hretu leh hmutu vek kan ni.
Tuna sawrkar thar hian compensation avanga harsatna thleng thei tur lo thenfai lawk chu tul tiin tunah hian DPR pawh siam peih hmain, compensatioin ngiatna avanga hmasawnna hnain a tawrh loh nan, dan hmangin a lo intlawhkhalh lawk diam tawh tihna a ni awm e.
Hetiang tak hian sawrkar kal tawhte khan hma an la la ngai lo niin a lang. Sawrkar kal tawhte demna ni lovin leh, tuna sawrkar thar fak bikna pawh ni chuang lovin, ram leh hnam inrelbawlna kalphung dik lo a awmin, siam that tum chuang lova a thatlohzia sawi ringawt hian ram ropui min thlenpui lohzia chu kan tun dinhmun mek hian a hril chiang tawh hle a ni.
Kawlphetha intodelh hi hmasawn zelna tura thil pawimawh hmasa a nih avangin, Mizoram hian kawlphetha tam zawk siam chhuah nan tuikhuah hi chu kan neih belh ngei ngei a ngai; mahse, a tha tih avang emaw, a hlawk tih vang emawa tui khuap vak vak thei kan ni lo tih erawh sawi tam a ngai tawh awm love; kan ram hruaitute hian an hre bel thawkhat tawh.
Tunhmaa ‘ram inneihsiak’ boruak kha reh tawh se a duhawm hle. Aikal lak pawh tihtawp theih a nih chuan, ram inneihsiak pawh a tihtawp theih em em ang.