Tuiluankawr mawlh hi…

PWD, Aizawl Road South Division chuan Kulikawn, Ngaizel Road – City Bus Office bula lung tla mai thei chu chhiatna a thlen hmain thenfai hna an thawk mek a, hei hi fur hmachhawn tura inbuatsaihna a ni a, a lawmawm e. Hetiang hian hmun dang pawh endik zui zel ni se, thenfai ngai te, siam that ngai te a awm zutin a rinawm.
Tuiluankawr mawlh mai hi. Kum tina fur laia chhiatna thlen chhan zinga langsar tak pakhat chu tuiluankawr mumal loh vanga tuihawkin a zawh loh tur a zawh thin hi a ni. Hetiang harsatna hi Aizawlah chauh pawh ni lovin, Mizoram khawpui leh thingtlang khua tam takah a thleng thin. ‘Tuiluankawr tha kan mamawh a ni’ tih hi chhiatna a thlen hlimchhawna thusawi lar tak a ni thin. Heti hian kum tin kan sawi thin. ‘Laiking pawnpui tah tur’ an sawi ang mai kan ni zel.
Thawkkhat lai kha chu AMC pawhin Aizawl khawpui chhunga drainage system kha a han vei viau a, mahse beisei an pha lo a, hei tuna kan dinhmun hi han en ila, tuiluankawr kan neihchhun-ah te pawh tuihawk luanna tur dalin bawlhhlawh a tlingkhawm leh mek tawh a, ruah han sur se, tuihawk hian a kawng daltu heng bawlhhlawhte hi kawngpui dungah a rawn vawrh chhuak leh chiam dawn tihna a ni.
Nikum khan CESJ chuan AR Lammual pangper atanga Bethlehem leh Tuithiang Veng huam chhunga tuihawk luan dan an thlithlai khan, tuiluankawr mumal a awm lo niin an sawi a. Kum 2017 khan Tuithiang Veng leh a chhehvelah hian leimin nasa tak kha a thleng tawh a, kha pawh kha tuiluankawr mumal loh vanga ngaih a ni a. He chhiatna thlen hnu hian helai pangper thla, Lammual atanga kawr hrang hrang atanga tuihawk luang thla hian luanna bik tuiluankawr a la nei mumal ta chuang lo tihna a ni.
|awngkama ‘mahni in bul tuichhe paihna tuiluankawr tha i siam ang u’ tia inhrilh liam mai lo hian, tuiluankawr chungchanga dan fel zawk ‘drainage system control & management’ te khauh zawka kan kalpui hi tihmakmawh a ni. Chhiatna a thlen hnua ‘tuiluankawr tha kan neih loh vang a ni’ tih paha chhiatna tawktute tanpuina ‘chuti zat chu a pe’ tih vela kan inthlah liam leh mai thin hi kan kalsan a hun ve ta hle a ni.