Tuipui kam hahchawlhna pawng kahnaah mi pathum thi

Southport, North Carolina-a tuipuia lawngleng atanga a kama hahchawlhna hmuna awmte pawng kahnaah mi pathum an thi a, mi dang eng emaw zatin hliam an tuar bawk tih thuneituten an sawi.
Inrinnia zan (India-a Pathianni zing)-a thil thlenna hi Southport Yacht Basin-a American Fish Company hmunah a ni.
Khawpui thupuangtu, ChyAnn Ketchum-i chuan lawngleng hi zan dar 09:30 (India-a zing dar 07:00)-ah a thlunna atanga inkhalh chhuakin a hnu lawkah khawmuala mite hi kah zui an ni a. A kaptu nia hriat hi Intracoastal Waterway lam panin lawngleng hian a tlanchhe zui nghal a ni.
Thil thlen hnu lawkah US Coast Guard-ten a bul lawk, thil thlenna hmun atanga khawthlang lam km 19 vela hla, Oak Island-ah darkar chanve vel hnuah a kaptu nia hriat hi an man zui a. Tu nge a nih erawh puan a la ni rih lo.
Southport Police Chief Todd Coring-a chuan an khawtlang dan ‘zan lungchhiatthlak tak’ a nih thu a sawi.
Southport hi mi 4,000 pawh an chen tlin lohna a ni a. “Khaw tereuh tê kan ni a, a chengte zawng zawng kan inhre vek a ni,” tiin Chief Coring-a chuan a sawi.
Mi paruk vek inhliam an awm nia an hriat thu a sawi a, an zavai hian damdawi inah enkawl an ni a. Thite erawh police hian tute nge an nih an la hre thei rih lo.
Silai a puah hnu lawkah hian thuneitute chuan Southport-a chengte hi pawn chhuak rih lo turin an ti nghal a; mahse, a hnu lawkah an rinhlelh hi man zui a nih avangin inkhuahkhirhna pawh thlahdul leh a ni.