TUIPUISUTHLAH

Rempuia R. Lutmang

-- Advertisement --

Tuipui han tih hian Sapin “sea” an tih hi mitthla a awl duh hle; mahse, Zopa hmuh phakah ‘sea’ (tuifinriat/tuipui) a awm lo. Lui lian tak an hmuh theih chin kha ‘tuipui’ an ti a, chu chu kan tawnga tuipui tak tak zawka chu a ni. A lui hming bîka hmanna pawh a awm nual, Khawthlang-tuipui, Khawchhak-tuipui, Chhimtuipui tih te a ni hlawm.
Lui tam zawk chu ruah sûr vanga a lian thut te a nih ngawt loh chuan naupang tan pawha dai mai mai theih deuh vek a ni a. Chutiang ni lo, lui lian chi kha ‘tuipui’ an ti. A hminga ‘tuipui’ tih awm chin chauh hi ‘tuipui’ a ni lo tihna a nih chu. “Tuipui lianin phairuang a hnawl” te kan tih hi.
Tuipui kam tui chîm chin leh chin loah hian thil to chi, awmhmuna tang nghet ve thei fe mai a awm thin. Chung hnim lian chi chu luipui tui hrût than a ni; amaherawhchu, luipui tui luang chak tak tak leh tuizangkhauhte’na a hrût nat phâk loh, lui kam titiha awm a nih zel avangin “tui sut fuh loh” tihna tawngkam atangin tuipuisuthlah an ti a ni. ‘Hlah’ hi chu ‘thelh’ tihna ti ta mai i la, kan hlah na na na chuan kan thelh tihna a ni si a, a hmanna erawh chu a inang vek thei lo ang a, a awmzia pawh a thuhmun diak diak thei lo ang. Tuipuisuthlah hi tui lo lianin a thawm han na viau pawh ni se a filh thuau ringawt zel mai a, tui lianin a la ve mai mai thei lo. A zung chawpa a hnawl fai vek te a nih loh chuan a tang ve thei hle a ni ang. Hei vang te pawh hian a hming a pu zo hle.
Kum 1973-a chhuak lehkhabu pakhatah chuan ‘tuipui sut thla’ tih a chuang a. Hetiang deuh lek lek, ‘tuipui-su-thlah’ tia hmang an awm nual, tunlaiah pawh hian (hyphen hi an lam dan tichiangtu atana dah a ni).
Pu Buanga khan he hnim lian chi hi a hming chi thum lai mai a khawn khâwm a, ngaihtuah chian chuan a dik thei naw naw vek.
1. Tuipui su-hlah
2. Tuipui sul-hlah
3. Tuipui sut-hlah.
Pakhatna hmangtute khian “su” an modify lo a, a nihna ang angin an hmang.
Pahnihnaa ‘sul’ hi a tobul chu ‘hnim’ tho ni mah se, ‘kal’ tihna tluka tawngkam thenkhata hman a ni ve a, insûl, insûlpêl te kan tih hi. Chutianga sûl chu hmangin “sul-hlah” an ti a ni mahna.
A pathumna hi kan sawi mek, mi tam ber hman dan a ni a. Lehkhabua mi, kan han sawi tak ‘tuipui sut thla’ tih leh mi thenkhat hman dan ‘tuipui-su-thlah’ tih te bakah, Pu Buanga hriat dan pakhatna leh pahnihna te hi, a zavai hian a hming dik hrula lo awm ve ni niin a ngaih theih. Pu Buanga hun laia mite zingah khan ‘hre thelh’ (‘hre hlah’ chu a ni lo) an awm ve teuh tawh dawn tih kha rinna mit lem lo pawhin a hmuh fiah theih a. Chu chu ‘tuibur-lu’ ti loa ‘tuibul-lu’ tih atang te pawh hian a chiang mai ang chu. ‘Tuipuiin a su ve lo a’, emaw, ‘a su chhe zo ve lo a’, emaw, hemi atang hian ‘tuipui-sut-hlah’ an lo ti a, chu chu a hming dik tak a ni.
‘Inthukru’ sawina ‘biru’ hi ‘bihruk’ tiin kan modify thin a. Hei hi mi thenkhatin ‘biruk’ tiin /h/ tel loin an lo modify em maw ni teh reng ni, ‘inbihruksiak’ tih turah ‘inbiruksiak’ ti tlat an awm, tam phei chu an ni lo ang. Hei taka hi chu lehkhabu pangngai emaw, dictionary emaw lama chuang phak a ni lo, hriat fuh loh laklawh entirna atan hman a remchang em a, tih thilthu mai mai a ni e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More