Tun hnaia ka tawn hriat pakhat : Dentist hrem thu

Lallunghnema
Charity Lodge
Cont: 9862288182

Consumer Huang min lo hlutsaka min lo chhiarsaktu zawng zawngte chibai tha ber ka buk a che u. In thil lei leh hmannaah (service) harsatna in tawh chuan inthlahrung lovin min lo hrilh ve zel dawn nia. Harsatna kan neihte hi ngawih liampui mai mai tur a ni lova, patling tak leh puitling taka hmachhawn thin tur a ni. Chu chu consumer-te mawhphurhna leh tih tur a ni.
Thuphâ ka chawi e:
Ka article chhuak hnuhnung ber thupui pahnihna ‘Ha siamtu hrem thu’ tih kha chhiar tur a lo awm ta lova. A tirah khan thupui pahnihnaah ka dah nain ka thu leh hla kha a sei deuh dawn avangin kan telh thei ta lo kha a ni a. Chhiartute in hrilhhai ka ring a. Ka inthiam lo khawp a, min ngam tlak tak tak thian thate chhuah chhalhna pawh lo dawng thiam turin ka inkau sa reng a. Mahse, ka rin aiin sawiselna ka dawng ta mang lova, ka lawm khawp mai. Ka tih dik lohah erawh thuphâ ka han chawi a ni.
Hei hi chhiar rawh:
Medical Negligence avangin Coimbatore Private Dental Care Centre-a thawk Dentist pakhat chu cheng nuai khat (Rs.1 lakh) leh legal expenses atan Rs. 5000/- chawi turin Coimbatore District Consumer Commission chuan judgement a ti chhuak a ni.
Hei hi thil thlen dan tlangpui a ni. Kumin February khan Mrs. S. Tharani, Paffanaickenfalayam a chêng mêk chuan a hâ(tooth) lama harsatna a tawh avangin he Private Dental Care Centre hi a pan (approached) a. Scaning an tih zawhin a hâ(tooth) pakhat chu phawisak(removed) a ni a. Mahse, ni 3 chhung zet a hâ chu a na chhunzawm tlat mai a; a mangang lutuk chuan a hâ phawitirna(removed) Centre chu a pan nghal vat a, mahse, an lo khar(closed) avangin private hospital dang a pan ta a ni.
Tichuan, he Clinic-a Dental Doctor- te chuan an han enfiah hnu chuan a hâ an phawinaah chuan thil fel lo eng emaw zat an hmu chhuak a; han dam khaw chhuak zia zang a ni love! He medical negligence avang hian nula Tharani chuan a hâ(tooth) pahnih dang chu a hloh(lost) phah nghe nghe a ni. He vai nula tum ruh tak Tharani lungawi lo lutuk chuan District Consumer Commission hneah chuan complaint a thehlut ta a. A tawi zawngin han sawi leh ta ila, he Coimbatore District Consumer Disputes Redressal Commission hian ngun taka a ngaihtuah hnuin Deficient Service a awm ngei tih a hria a. Medical Negligence pawh he Dental Care Centre hian an ti ngeiin a puh bawk a. Tichuan, he Dental Care Centre hi Rs. 1,00,000/- (Rupees One Lakh) only chawi turin a ti a. Vai nu Tharani’n Consumer Commission a, a complaint buaipuina a, a senso Rs. 5000/- pawh Commission hian Dental Care Centre hi a chawitir a ni.
He vainu thil tih ropui tak atang hian inzir ve rawh u:
Tlem lai deuh khan Mizoram pawn hmun danga Medical Negligence chungchanga consumer court thenkhat judgement ka lo ziak tawh thin a. Mizoramah pawh hian hetianga Damdawi in emaw, clinic emaw, doctor ten an patient te laka pawi an khawih hi a awm reng niin a hriat a. Mahse, kan changkan loh luatah kan ngawi liam mai mai fo thin a ni. Sual kan khawi ngam a ni ber e. Vai nula huaisen, sap tlangval huaisen hnungah hian nawm chenna leh hmasawnna tlo lova intlansiakin kan phe kan phe mai thin zawng a nih hi! Mizo mipuite u, harh chhuak mawlh teh u. Dawizep hi chânna a ni ngai e.
Mahse, tunah hian Consumer-te hmakhua ngaihna nasa tak a awm chho mek zel a. A lawmawm hle! Chu consumer revival lipuiah chuan mi thenkhat an inchiah mek a ni. Consumer Movement thlipuiin a nuai tak tak hun a nghah-hlelh-awm hle mai. Consumer-te dikna leh chanvo humhalh duhna leh châkna thlarau a thlen hun a nghahhlelhawm hle a ni. Hetih laiin Complaint thlen kan intihhmuh chho mek zel. Kei ve pawh hian ka dawng zel a, ka buaipui zel dawn a nih hmel e.
Hei pawh i inzir nan:
Hmanni lawka ka thu dawn hi a ngaihnawm ve hrim hrim. I han ngaithla teh ang.
Complainant : Pu Hnema i ni em?
Keimah : Ni e, eng nge ni? Khawi atangin nge? Tu nge i nih a, tu nge i hming?
Conplainant : (A hming leh awmna min hrilh a – llh). Dawr pakhata mi washing machine part ka lei a. A man chu a tam pawh a ni lova. Ka washing machine a ka fit theih loh avangin he dawr neitupa hnenah hian kalin ka zu complaint a.
Keimah : Eng chu nge i harsatna chu ni ta?
Complainant : Ka part lei chu ka keng a, a man min kir(refund) ka dil nghal a. Anni chuan heti hian dah la, a part man chu kan lo g-pay dawn che nia, an ti a. Mahse, rin ang a ni ta lova, kan rawn g-pay dawn che, naktukah a lo lut ang, an ti, an ti a. Hei July thla a mi kha a nia, tun thlengin min la tih felsak thei lova. Ka bei a dawng a, ka rawn pun che a ni.
Keimah: A nih tak chu hetiang hian min rawn thawn rawh aw:
1) I hming leh address. I contact number. 2) Dawr hming leh contact number. Bungraw hming leh a man zat. 3) Harsatna tawh dan. Bungraw lei ni.
Heng zawng zawng hi ani hian a tih fel hnuin ka va be ve leh thuai mai a! â takin!
Dawr neitu : Kan lo ti fel dawn nia. Naktukah lo ngaihven rawh se.
Keimah : A lawmawm e.
Complainant : Ka pu, min lo biaksak ta em?
Keimah : Ka va bia a, tlai dar 3 velah lo ngaihven rawh se, a tih che kha. I va ti fel mai ang chu maw.
Complainant : A ti leh chuang lovang.Mi a tiam zing lutuk a, ka ring ngam tawh lo a ni.
Keimah: Kal ringawt rawh, inthlahrung suh, hlau suh.
Complainant: Hei, ka pu, an dawrah chuan ka kal a, ka nghak mek a…
Keimah: An pêk hmâ che chu nghak tlat rawh. Chanchin kan inngaichang zel dawn nia.
Complainant: Ka pu, pawisa chu min pe let leh (refund) ta e. Ka lawm hle mai. Ka beidawn hnuah min pui a, ka lawm tak tak a ni.
Keimah: A va lawmawm tak ve! Nawr hram hram lo la, chu an lo fanghma no ei mai mai ang a, cheng tam tak an eisak dawn che tihna a ni a. Kei pawh ka lawm e.
Hetiang vel hi a ni a. Complainant complaint zin kawng chu a lo tâwp ta a ni.