Tun inthlan hian Zoram a khawih thui dawn – Lalsawta

Tun inthlana a tlingte azirin Mizoram a khawih thui dawn tih Congress president Lalsawta chuan a sawi.
Thawhlehnia Lungdaia vantlang inkhawm neihah MPCC president chuan sum neite chauhin kan ram rorelna inpui an luah loh a, mi dik leh mi thaten an retheih vanga ram rorelnaa an tel ve theih lohna chu Congress party chuan a thiat mek a, hma an la zel dawn tih sawiin, “Kan ram siam tura kan rin chhan chu Pathian a ni a, kan lama tang Pathian kan nei. Dik tak leh huai taka rorel turin min duh a, a duh dana kan tih hian min tanpui ang tih pawh kan ring a, kan zam lo,” a ti.
Congress party leh mipuiten sum hmachhuan leh tawktarhna kan tibo dawn, tiin, bial tan hna thawk thei ngaihtuah hmasak ber a tul, tiin, “Kumin inthlan hian Mizoram a khawih thui dawn,” a ti.
Tlawntu leh tilungawitu a ngaihtuah loa, ram rorelna tha nei turin a reltu mi 40 an that a ngai tih Lalsawta hian a sawi. Mipui tha viau mah ila, a reltu MLA an that loh a, a lu ber hming a hliau miau chuan rorelna tha kan nei ngai dawn lo tih a sawi a ni.
“Tun inthlanah a hmaa hausa nia kan hriat loh, lo hausa ta viauten sum an ui lo hle. Suma lei theih sal neih hunlai a liam tawh a. Mihringte hi Pathianin duh taka a din leh a siam kan ni a, suma lei theih kan ni lo. Lal Isua thisen chauha lei kan ni. Kan duhthlanna pawh min zahsak lo, sum hmanga hmusit taka min lei tumtute hi ro min rel sak turin kan thlang ang maw? Nangmah zah lo leh hmusittu hian zah bik a phu lo, nangmah kalsan turin ti la, kan ram hmelma i ni, kan ram hmalam tichhetu tur hian kan thlang thei lo che, lo ti rawh u,” a ti.
Election Commission leh MPF-in nasa taka sum sen loh an duh a, an duh dan pel a awm a nih chuan dah bo turin a ngen tih Congress hruaitu hian a sawi. “MPF duh angin tumah phurrit insiam loin ram siam ang u. Engmah therhlo leh inpek tur kan nei lo, mahse ram rorelna tha kan tiam che u,” a ti.