Tun sawrkarah dawt thu kan hre hnem – Lal Thanzara

Tun sawrkarah dawt thu kan hre hnem
– Lal Thanzara
Tun sawrkarah dawt thu kan hre hnem a. Sawrkar mek hian an sawrkar theihnan dawt leh thutak chanve nasa takin an sawi, tiin Congress hruaitu Lal Thanzara chuan a sawi.
Zirtawpnia Congress Bhavan-a inkhawmah MPCC president Lal Thanzara chuan, tuna sawrkar mekin an sawrkar theihnan dawt leh thutak chanve nasa takin an sawi a. Thingtlanga kuthnathawktute pawhin an thusawi awihin an thlai thar leh sawhthing an leisak duh ringin an vote ruih ruih tih a sawi.
“Roreltuin dawt a ngaihsan chuan a chhiahhlawhtinte chuan an sawi mai thin a, he thil hi kan tawng mek a, kan tawng chhunzawm zel ang tih ka hlau a ni,” a ti.
Mizo mipuiin kan duhthlanna kan chik ngun a ngai a. Kan duhthlanna ngeiin kan enchhin mek tih a sawi a. “Kan duhthlannaah kan tifuh em tih pawh tuna VC inthlan neih dawn mekah hian ngaihtuah chian a ngai,” a ti.
Duhtlanna siama Congress zawm tharten an tihsual a ring lo tih MPCC president hian a sawi a. Politics chu Pathian rawngbawlna pawimawh tak a ni a, Pathian rawngbawlna a ni tih hre loa miin hma a lak a, politics tuinua inchiah a, diklo taka ram kaihhruai a nihin politics ngaihven duh lo inti emaw, ngaihtuah lo intite pawh politics kalsual chuan a hrut tel ve dawn tho tih a sawi.
Congress party-a mi tam tak an lo luh mek chhan chu, an hotu kalta ten Pathian malsawmna dawngin dawtin ram an hruai ve ngai loa, dawtin manifesto an siam ve ngai lo tih a sawi a. Economic programme mipui khaichhuahna tur an tihhlawhtlin thin avangin Mizo mipui tam takin Congress-ah rinna nghatin an lut mek niin a sawi.
“Mizo Kristian, kohhran mi kan nih angin politics-ah pawh eng party-ah hian nge kan awm ang, tih kan chhut a ngai. Ringtu, kohhran mi sakhaw zalenna chawinun duhtu, chanchintha dodal ve lo, BJP sum hmang ve lo kan nih angin he party kaltlang hian kan ram, kan hnam, kan sakhua himnan hna thawk ang u,” Lal Thanzara hian a ti.