Tun thla 8 chhung velah police 59 suspend tawh

Sawrkar a inthlak hnu, tun thla 8 chhung velin Mizoram Police zingah suspend tawk 59 an awm tawh a, a tam zawk hi zu ruih vang a ni.
Hemi chungchang hi Assembly Session neih zawh takah khan ziaka zawhna chhan chi ah zawh a ni a. Home department chhinchhiah danin, sawrkar inthlak hnu, 2023 December 18 atanga kumin August thla tir lam thleng khan police 59 suspend an ni tawh a. A tam ber hi duty laia zu in leh rui an ni.
Kuhva tawlhruk kaihhnawiha suspend bakah ruihhlo kaihhnawiha suspend an awm a; rukruk vang leh discipline chhia vanga suspend an awm bawk. Slai leh a mu tihchingpen kaihhnawih leh roll call laia tlanbo vanga suspend te pawh an awm a, suspend tam ber hi armed battalion hnuaia awm an ni a. District Executive Force (SP office/ police station adt.) a awm lai zingah Aizawl leh Saitual DEF-in suspend tawk an ngah ber a ni.