Tun thla tawpa khelh tan tur Pro Volleyball League

Tun thla tawpa khelh tan tur Pro Volleyball League
Tun April ni 29 atang hian Mizorama volleyball inelna lian Pro Volleyball League vawiriatna khelh tan a ni dawn a, Mizoram volleyball inelna sang ber hi May ni 23-ah hmeichhe inelna an final ang a, a tuk May ni 24-ah mipa inelna hmanga hmawrbawk a ni ang.
LPS Arena, Falkland-ah mipa team paruk leh hmeichhe team pathum an inel dawn a; zan dar 8 atang vekin inkhel vawi 22, mipa tum 18 leh hmeichhia vawili a awm dawn a ni.
Season kal mekah Pro Division inelna vawihnih buatsaih a ni tawh a, Thutak Nunpuitu Team-in hma an sawn tih lantirin Tuichangral nen trophy pakhat ve ve an la.
Hetih lai hian season tir atanga Pro Division mipa team paruk zinga tel Durtlang North leh Chhinga Veng Spikers-in harsatna an tawk a, kum an tluan zo lo.
Thla liamta khan Pro Division inelna MVA Cup chu Lungleiah nghah niin, Durtlang North leh Chhinga Veng an tel loh avangin Pro Volleyball an khel thei lo.
An hmun ruak hnawhkhahna’n April ni 1-3 chhungin Tuikual Indoor Stadium-ah playoff khelh niin, team pathum inel zinga sang ber Anastasia Electric Veng leh pahnihna Hunthar an tling a, Dinthar an tlang zo lo ve thung.
May ni 31, 2024 khan final-ah Huntharin 3-1-a Tuichangral hnehin a vawithumna’n Pro Volleyball mipaah an champion a, mahse, inrelbawlna lamah harsatna an tawh avangin season tharah division sang berah an awm zui thei lo. Chutih laiin season tawp lamah hun tha neiin Pro Volleyball title humhim thei turin an kir leh dawn a ni.
Pro Volleyball hmasa ber 2015-16 champion Anastasia an kir leh bawk a; 2022-23 champion TNT leh a vawikhatna’na Mizoram inelna sang bera champion tuma bei mek Tuichangral bakah a tumkhatna’n Pro Volleyball-ah tun season-a kai thar pahnih Khawbel leh Sihphir an inlan dawn.
Kum liamta khan Pro Division-ah hmeichhe team nga an awm a, tun season-ah pathum inziaklutin, kum zawna Pro Volleyball champion ni lai Luangmual leh team hlun Bungkawn bakah Diakkawn ni thin Kolasib-in champion nih an inchuh ang.
Hmeichhe team inelna hi kum 2017-ah buatsaih tan a ni a, kum 2018-ah awl lehin tun hi a tum rukna tur a ni.
Tun season Pro Division inelna hmasa ber nikum October thla khan MVA Invitation Cup mipaah Tuichangral an champion a, final-ah 3-1-in Chhinga Veng an hneh; hmeichhe final-ah Kolasibin Pro Volleyball final-a an hneh loh Lungmual laka an tlawmna chhangletin 3-1-in an chak a ni.
March thla khan Lungleiah chungnung takin MVA Cup mipaah TNT an champion ve thung a, an bitum hneh fai vekin final-ah 3-1-in Tuichangral lakah an chak.
Hmeichhe final-ah set hnih hloh hmasa Luangmualin 3-2-in Bungkawn an hneh a, Invitation Cup champion Kolasib-in final an lut pha lo.