David M. Thangliana
-- Advertisement --
Harsatna lian engmah tawk lovin Mizoram chuan Kumthar kum 2025 kan han chuangkai leh ta hi a lawmawmin chhungkaw thenkhat erawh vanduaina avangin lawmin an hlim thei lo a, a pawi hle mai. Eng pawh nise, a ram pum ang chuan Mizoram mipui chuan Kumthar 2025 hi sawrkar thupek pawh zah lo leh zawm zo loin halpuah leh halmawiin kan lo lawm a, hei hian sawi zui pawh a hlawh hle.
HALMAWI/HALPUAH KHAP
Nikum Krismas hmaa ka article pakhatah khan ram palaileng vela halpuah leh halmawi vel halna hmun leh hun siam ni ta se tiin rawtna ang rengte ka rawn siam tawh a. Social media vela sawi hlawh tak, sawrkarin a khap chunga Aizawl leh district khawpuia halpuah leh halmawi hriat tur leh hmuh tur tam tak awm khan tute hnenah pawh ngaihtuahna a siam ngeiin a rinawm a, heti ang thil hi khap tur nge ni ang a, awmze nei zawk a tih dan ngaihtuah tur tih hi kan ngaihtuahna luahtu ber niin ka ring.
Chiang taka halpuah leh halmawi chungchanga sawrkar khapna mipui lamin an ngaihdan lang chu sawrkar thupek kha mipui tam zawk chuan kan zahin kan zawm a, a zawm lote pawhin an bawhchhe uar lo tih hi a ni. Ka sanaá ka lo chhinchhiah danin December 31 zan dar 11:45 velah halpuah thawm leh halmawi thawm a ri tan a, zanlai dar 12 bawr velah a vawrtawp thleng chho in heng puak thawm hi rei lo teah a tlem tawlh tawlh a, zanlai dar 12:15 vel kha chuan a reh titih tawh a, zanlai dar 12:30 kha chuan thawm a awm tawh lo tih theih a ni. Kum 2024 kan lawm luh nena khaikhin chuan ziaáwm tak a ni.
Mizoram State Pollution Control Board-in a tarlan danin boruak chhiat lai berin hemi zan hian Air Quality Index (AQI) ah 115 chauh a ni a, nikum 2024 kha chuan hemi hun lai vekah hian AQI hi 597 lawih a ni. Halmawi leh halpuah khap kawngah sawrkar a hlawhchham tia kan sawi chuan haltu mi engemawzat an awm miau avangin a dik a tih loh theih loh a. Mahse sawrkarin khapna thupek a neih loh kum, kum 2024 nena khaikhin chuan sawrkar khapna khan hlawhtlinna chen a nei a tih theih tho bawk awm e. Thil reng reng hi kan tehna azirin hmuh dan a inang lo thei a. Pa pakhat pawhin sawrkar officer pakhat hi, “Ka pu, Aizawl atanga Silchar hlat zawng hi km engzat nge?” tiin a zawt a. Officer chuan, “Km 180 bawr vel a ni,” a ti a. Chu pa chuan, “A nih, ka pu, Silchar atanga Aizawl hlat zawng hi km engzat nge?” a ti leh a. Officer chuan, “I va han mawl em em, Aizawl nen a inhlatna a inang reng ang chu,” a ti a. Chu pa erawh chuan, “Enge ka mawlna? Krismas leh Kumthar inkar leh Kumthar leh Krismas inkar hi a inzat bik em ni?” a ti e, an ti a. He mite pahnih hi an ngaihtuah dan atang chuan an dik ve ve tlat a ni.
Hun pui lawm nana khap neih tam lutuk hi thil tha ber ni tain kei chuan ka hre lo a. Tunhma deuh khan nula leh tlangval, inngaizawng han terek hrang deuh kha khawtlangìn kan ngaithei lo a, kan um kan um mai a. HIV/AIDS leh KS hluar laite khan mahni veng chhungah heng KS enkawlna tur dah te, HIV/AIDS laka invenna tur lakna hmun dah te kha veng thenkhat chuan an duh lo a, kan innawr kan innawr a nih kha. Mahse thil kan han hrethiam chho zel a, hlauh tur leh hlauh loh tur te, khawtlang himna tur zawk a ni tih te kan hriat hnu chuan mawl taka kan ngaihtuahna kha kan paih a, hriatthiamna nen kan awm ho chho ta zel a nih hi.
Heti ang bawk hian mi tana harsatna siam loin halmawi leh halpuahte pawh hi a hal theih a ni tih kan hriat hun leh, heti anga hal nachâng kan hriat hunah chuan khap khap ngai lo in midang ngaihchânna châng hriain hunpuite pawh kan la lawm lut ngei ang. Tun dinhmunah erawh chuan sawrkarin thupek a chhuah a, thupek zawm lotu leh ngai pawimawh lotute chu man an nih chuan dan ang a hrem ngei tur chu an ni ang. Chutihrual erawh chuan rilru tha lo put vang emaw, sual hrim hrim vang emaw a heng min mante hian dan an bawhchhia a ni lo tih an chunga roreltu tur te hian an hriatthiam theih chuan a lawmawm ngawt ang.
TUAL THIHNA
Krismas dawn a ruâiah Tuirial Airfield venga VDP/YMA Kumpuan member-te chuan mi pakhat an sawisa hlum hlauh mai a, hei hian Krismas boruak pawh mi tam tak tân chuan a tichhia a, Mizoram mipui sawi a kai hial a. He thil thlenga thil pawi tak pakhat chu Kohhran hotute lam demna nasa tak awm kha a ni a. Kan thalai tam tak hian a der maia Kohhran an zah tawh laia Kohhran anga mualpho theihna ni thei thil awm kha a pawi tak zet a, Kohhran zahpah lohna leh rin tâwk tawh lohna thalai zingah a vulh lian zel ang tih a hlauhawm hle a ni.
Sawi tawh angin kan tehna leh kan thlirna azirin kan thil hmuh dan hi a inang lo viau thei a. He tual thihna avanga Pastor lo dem viau ho thlirna atang chuan Pastor hi a demawm ve thei tho mai. An sum bo hi eng ati nge police-a a report mai loh tih te, eng vangin nge sum bò avanga VDP/Kumpuan member-te’n an mi mante an vuak tawh loh nana hma a lâk vat loh tih te hi Pastor demna thenkhat chu niin a lang. Police hnena thil report hi mi tam tak tan chuan thil hautak tak a ni thei a. Police Station hnai ber atanga kan awmna a hlat viau phei chuan khawtlang enkawl tura ruatte kuta report mai pawh hi a samkhai zawk daih a ni. Pastor tân pawh hian lirtheia minute 20/30 kal ngai a report ai chuan a hlimchhawnte a lo ni bawk nen, khawtlang hruaitute hnena a sum bo report kha a tih tur a ni lo chuang lo. He tual thihna chungchangah hian social media vela comment-tu thenkhatte’n an hmuh thelh der erawh chu thihna lo thlen dan leh thihna thlen chhan hi a ni.
Mizoramah hian vantlang kuta thi ta hi sawi tur a tam tawh awm e. “An um hlum,” tih te, “An vaw hlum,” tih te, “An piai nasa lutuk deuh a ni,” tih te tunhma deuh kha chuan kan hre zing hle a, tunhnu hian kan hre khat ta deuh mai zawk a. Thuneihna chhete han neih hian kan inluling duh khawp mai a, hei hi mihring pianzia a ni. Misual nia kan hriatte lakah phei chuan kan kut a rangin sawisak hrep duhna thinlung a lian hma hle. Dân leh hrái hnuaia khawsa, dân hnuaia awm kan ni tih theihnghilh hi a awl nge, kan haider thin zawk tih te hian heng tual thihna a lo thlen hian ngaihtuahna a siam thin a. Tuirial Airfield Venga tualthihna pawh hi Pastor lam ni lo ín, mi nunna lak sak hial khawpa a sawisatute lam hi kan rilru awmna tur zawk chu a ni. Thil sual titu, pawikhawihtute chhui a mantu tur an awm a. An thil chhui azirin an chungthua roreltu tur an awm leh a, roreltute hian an nunna thlenga lak sak theihna thuneihna an nei a, an ni tih loh chuan dân hnuaiah nunna hial inlaksak theihna thuneitu kan awm lo. Nunna laksak chu sawi loh, thu dik hriat duh avanga indawpnaah pawh kut thlak theihna nei hi dan hnuaiah chuan an awm lo hial awm e.
Mob rule emaw, “mini-mob rule” emaw hnuaia thil tih sim a, dan ang taka thubuai/hlabuai rem hi Mizoram mipui hian kum lo thar mekah hian kan zir chhuah a ngai a ni.
LALHNAM SAKHUA
Krismas hma deuh hlek atang khan YouTube channel eng engemawah Lalhnam Sakhua hi a rawn lar chho a, he sakhua hi thenkhat chuan “Pu Rorelliana Pawl” te pawh an ti awm e. An zingah hian a hruaitute zinga a mi, Mizoram mi lar, Pu B. Lalthlengliana, mi tam zawkin “Thangkura” tia kan hriat pawh a tel ve a, ani hi YouTubers-te’n an kawm ber pakhat a ni.
Mizote hi kum 1894-a Welsh missionary pahnih Mizorama lo chuang chhuakte hnen atanga Kristian sakhua hi hmelhriat kan ni a. Hemi kum atanga kum 40/50 lekah Mizo mipui chu Kristian sakhaw zawmtu kan ni ta deuh puk mai a, tuna Mizorama Mizo la dam zawng zawng hi kan pian tirh atanga Kristian ni sa kan ni ti ila kan sawi sual tam puiin ka ring lo. Tuna Lalhnam Sakhua vuantute pawh hi an zinga thangthar tih loh chu Kristian sakhuaa piang leh sei lian an nih deuh vek a rinawm.
Khawvelah hian sakhaw hrang hrang hi tam tak a awm a, ram bung pakhat ringawtah pawh sakhaw tam tak a awm a, India ram hi sakhaw hrang tamna ram pakhat chu kan ni ve ngei ang. India Hmarchhaka state pathum, Mizoram, Nagaland leh Meghalaya hi Kristian sakhaw zuitute bitna bik kan ni a, mahse heng state-ah te pawh hian mahni pipu sakhaw zui zeltu an awm vek a, Mizoram pawh kan bâng bik lo a nih hi.
Kristian sakhua hian Mizoram a chiah hneh tawh em avangin Mizo si, Kristian sakhaw vuantu ni lo chu kan han dem hle mai a. YouTube vela comment ka hmuhah chuan Pu