Turkey-in Kurdish helte bei na hle

Turkey chuan Kurdish rebel te beiin northern Iraq a Kurdish hel pawl te tawmna indo thlawhna hmanga a beih thu Interior Ministry chuan a puang a.
Turkey chuan hmun pawimawh 20 an tihchhiatsak thu sawiin heng hmunah hian dan pawna hnawl PKK rebel group te awmin ‘neutralised’ vekin an awm tiin a sawi.
Hetianga Turkey-in hma a lakna chhan hi Ankara-a Pathianni zinga bomb tihpuah vang a ni a. Ankara a bomb tihpuah hi PKK te chuan an member te tih niin an sawi a, thihchilh bomb an ti puak a ni.
PKK member nia ngaih pakkhat chu bomb a tihpuah leh hmain police ten an kaphlum hman a, police pahnihin hliam an tuar thung a.
Kurdistan Workers’ Party (PKK) te chu Turkey-ah terror group anga ngaih niin EU, UK leh US te pawhin terror group-a an puan an ni bawk.
Turkey chuan PKK tena puk, depots leh bunker an hman te chu indo thlawhna hmanga an thlurbing tiin an sawi zui a.
“PKK leh terror elements dang te hmun beih niin terrorist tena northern Iraq-a bukhuara min beih zui tawh loh nan leh kan law enforcement te an beih tawh loha kan ramri a him zawk nan indo thlawhna hmanga beih an ni,” tiin sawi a ni.
Kurdish news agency Rudaw te chuan Turkey hian Iranian border bula PKK te tamna hmun Mount Qandil chu an thlurbing tiin a sawi a.
Hetianga Turkey-in chetlakna a neihna chhan hi summer break neih hnua Turkey Parliament thutkhawm hma lawka Ankara a Ataturk Boulevard a bomb an tihpuah vang a ni ber a.
He bomb tipuaktu nia inchhal Immortals Battalion te chuan an tih a nih ngei thu sawiin parliament hnaih taka awm ministry te chu an thlurbing tiin an sawi a.
Bomber pakhat chuan car a chhuahsan veleh puak thei vawm chhuakin chu chu security te rilru lak pen nana a tih a ni a. A hnuah pakhat dang chuan ministry gate bula security te chu silaia kapin a bomb pai chu a tipuak zui ta a ni. A hmasa zawk erawh compound chhunga tlan luh tuma a beih laiin police-te an kaphlum hman thung a.
Police officer pahnihin hliam an tuar a, an nunna atana hlauhawm a ni lo tiin Turkey Interior Minister Ali Yerlikaya chuan a sawi.
Kurdish militant te hi tun hnaiah Turkey chuan a bei na hle a, an huaitu lawk te chu lung inah khung hlawmin Turkey ram chhunga an hmunpuite leh Syria leh Iraq-a an inbenbelna tinte pawh an bei nasa hle a ni.
PKK te hi marxist-Leninist root nei niin kum 1970 vel atang khan Turkish sorkar lakah inlakhran tuma bei tan tawhin Turkey ram chhung sahthlaka Kurdish state din tum te an ni a. Kum 1990 chho atang khan independent state an ngiat chu thlauh thlain Kurds te tana autonomy sang zawk an ngiat a ni.