Khawpuia cheng miretheite khaichhuah kan ngaipawimawh – Deputy CM

UD&PA changtu deputy chief minister Tawnluia chuan khawpui chhunga miretheite khaichhuah chu an ngaipawimawh tih a sawi.
Cheng nuai 170 senga sak Khawzawl District Urban Development Officer (DUDO) office chu Thawhtanni zing khan deputy chief minister hian a hawng a. Mizoram State Rural Livelihood Mission (MzSRLM) Credit Camp neih nghal a ni.
Khawzawl Zaingen Venga DUDO office sak thar awmna hmun hi deputy CM Tawnluia te chhungkuain an pa, Hrangkhupa hriatreng nan an pek a ni a. SEDP 2019- 2020 leh 2022- 2023 atanga sakna sum hi hmuh niin, building sak zawh nan cheng nuai 380 ruahman a ni. Building hi Zopa chhiara chhawng ngaa sang tur a ni a; staff quarters, DUDO quarters, office, garage, guest room leh conference hall a awm dawn a ni.
UD&PA chuan khawpui tihchangkan, tihhmasawn leh khawpui chhunga miretheite khaichhuah a ngaipawimawh hle tih Tawnluia hian sawiin, Khawzawl leh district chhung atanga ram pum huap fai lawmman dawng an awm thin chu lawmawm a tih thu te, district khawpui a nih hnuah Khawzawl chu UD&PA hnuaiah nasa taka cheithat leh cheimawi niin, khawlai chei nan ringawt pawh cheng nuai 300 hman a ni tawh thu te a sawi.
MzSRLM hnuaia Credit Camp neihah hian self help group (SHG) 65 ten bank branch 5 atangin loan Rs. 2,32,40,000 an la a. Khawzawl RD Block hnuaiah hian khaw 26 awmin, SHG 400 an awm a, member 3448 an awm mek.