Lalchhandama Colney
Ph – 9862982321
-- Advertisement --
Mizote tute nge kan nih han tih ngawt mai chu, mi chi hrang hrang kan ni a, chu bakah hnam peng hrang hrang kan awm ve bawk a, sawi thiam a har deuh mai thei. Mihring pangngai angah hi chuan kan tha viau emaw kan intih lai hian mite chuan min lo hmu ru kar thei a, tha lo viau emaw kan intih lai vek hian mite chuan min lo fak ve viau thei bawk a. A hnam ang pawh hian hmuh dan leh sawi dan hrang hrang a tam thei ang. Tun hma kha chuan Japanese hote hi hnam rinawm ber ang deuh a sawi thin an ni a, nupui pasalah pawh an tha awm mang e, kan naupan lai chuan kan lo ti ve thin. Sap hote hi kan lo hriat dan chuan hnam changkang, fai, taima, kan ti a, Chinese ho ve thung chu kungfu thiam, tiin kan lo hmel hriat thin a ni. Kan thenawm Burmese hote ve thung hi chu ram rethei, an ram hausaknate pawh an eiru zo zel, tiin kan lo hre ve a ni. Bangladesh hote pawh ram changkang lo, tanpui ngai zauh zauh reng, tiin kan lo hre bawk a. Pakistan mite kan hriat dan pawh hi a tha lem lo, India hmelma kumhlun, kan inep deuh reng thin a ni.
Tun hma chuan Mizote chu mi min hriat dan chuan hnam mawl, mi lu la hnam, tiin min hre thin. Saphoin min han awp a, missionary-te an lo lut a, min hriat dan leh pakhat chu, hnam bal, tih a ni leh a ni. A ni tak a, khatih hun lai khan an inbual ngai lo, fur-ah ruah in a nan a, chu chu a ni deuh mai. Kristian kan lo nih hnu hian kan lo changkang ve telh telh a, a, aw, b te kan lo nei ve a, kan tawng chu a lo ziah ve theih ta a ni. Keimahni inhriat/sawi dan chuan, Mizote chu thian chhan thih ngam, sa leh ral hmaa zam ngai lo kan ni. India Independent hnu a, distric council kan lo nih ve atang khan politics-te pawh kan lo hmelhriat ve tan a, kan han ti ve tan a ni. Loneih kha kan eizawnna bul pui ber a ni thin a, mahse, ration buhfai alo awm chinah chuan kan lo innghat ta zawk a ni. Hnam dang ten min han chim ve tak tak chinah chuan Mizote paw’n an tih dan te la in, a then laiah chuan kan that phah a, hlawk pui lem lohna te pawh kan nei bawk. A tlangpui thuin tun hma Mizote kha, vaiho min hriat dan pawh, tlangmi, tribal, tih a ni.
Tun hnu hian Mizote hi eng ang mi nge maw kan nih le. Tribal chu kan la ni reng a, mahse, mi lu la hnam chu min ti tawh lo. Mi min hriat dan pakhat chu Kristian ram tih a ni. Min hriat dan pakhat leh chu ziak leh chhiar thiam tamna ram. Kristian ram min tih rual hian mi min hriat dan chu – cancer tamna, AIDS tam na, fahrah tamna, tih te a ni. Tin, zuk leh hmuam uar ber pawh kan ni. Vaiho min hriat dan pakhat leh chu ram intodelh lo, chawmhlawm state, tih a ni. Keimahni han inen hi chuan lehkhathiam pawh tam tak, kan in leh lo, engkim mai hi tunlai ber ber chi hlir a ni, chuvang chuan, mi changkang/ram changkang ni awm tak kan ni. Sawrkar pawh a hausak hmel viau a, mahse a hausa lo, a hnathawkte hlawh pek mai tur neih loh chang a nei. Mipuite pawh chuti deuh mai mai chu kan ni, pawisa emaw a thlawn/awlsam taka kan hmuh theihna tur a nih chuan khua kan hmu thui vak ngai lo. Pawn langah chuan kan phunchiar, thil tha duh kan inti ve em em, mahse, kan ho ru riau thin. Mizote kan tan a ngai, min engtin nge min hria se kan duh ber ang aw, thatchhia, rethei, tih te chu kan duh der si lo a. Hnam rinawm, taima, hrisel, tih te chu min hriat dan ni thei se, duhthusam a ni a, mahse, a ni ngawt thei si lo va. Hnam rinawm ni thei turin a bul atanga kan tan a ngai, cheng-nga atanga kan rinawm a ngai. Hnam rinawm ni thei turin ka kristianaah ka chian a ngai, rilru fim tak nena Pathian thuawih a ngai. Kan politics khelh dan te pawh hi inenlet ve fo a va tha em. Hnam taima ni turin inchhungkhur atanga kan tan a ngai, nu leh pa, rual-u zawk ten kan tan a va tha em. Hnam hrisel, dam rei ni turin kan tan a ngai hle mai, ei leh in bakah zuk leh hmuam te pawh kan tih loh a, ei tur te pawh thianghlim leh tha kan thlan thiam a pawimawh hle mai. Kan hmingthat theih dan ber tur chu mi tin hian sum tam tak aiin hmingthat thlang theuh thei ila, tichuan Pathian thuawih kan lo ni bawk ang a, kei kei tih aiin nang man le, tih chu a lo ni dawn a ni. Ram nuam tak a lo ni ang a, miten min awt ru ve dawn a ni. Aw le, eng pawh nise, kan tan a ngai hle mai.
Mizote, hnam dangte hian engtin nge min hriat ang aw, kan intih ‘champ’ viau lai hian hnung lamah min nuih ru tet tet ang tih chu a hlauhawm viau mai. Hmingtha tak ni tur chuan kan thawhrim a ngai, a bul atanga dawt te pawh kan sawi loh a ngai. Kan dawhtheih a, teirei peih te pawh a ngai, rilru fim leh ngaihtuahna thiang tak kan neih zel theih nan ruihtheih thil, zuk leh hmuam lakah te pawh kan inthiarfihlim deuh deuh a ngai. Kan ram rorelnate pawh hi kan tih chak a ngai a, chu mi tur chuan mi tha, rinawm, taima, kan thlan chhuah thiam a pawimawh hle ang. Mizote hnam rinawm lo, rethei, changkang tak tak lo tia hnam dangten min hriat loh nan, kan zavai hian mawh kan phur theuh a, kan awmna hmun theuh atangin ngaihtuahna i seng thin ang u. Sawrkar tha leh tha lote pawh hian kawngro a su hle a, chuvang chuan, i duhthlanna hmang fimkhur ang che. Aw le, tute nge kan nih? tih zawhna chu i ngaihtuah tlang fo thin ang u.