Tute’n nge mimal chawimawina dawng ang?

Mahindra XUV3OO LPS Cup semi-final chinah Kawnpui Joint striker Lalkrossmawia’n goal a thun tam ber a, player tha ber chawimawina dawng thei turin Joseph Lalthafela (Sihphir Venghlun) leh Joseph Lalrinawma (Kawnpui) an langsar.
Aizawl District Football Association buatsaih khua leh veng inelnaah hian team 62 telin, player 1240 chuang ziahluh an ni a, Aizawl district pawn atanga sawm bik team pali zinga mi Kawnpuiin final-ah Sihphir Venghlun an khelhpui dawn a, team pahnihte kawng hrang hranga khaikhinin an intluktawk hle a ni.
Round hmasa berah Kolasib district team tha Kawnpui an bye a, final luhna’n vawinga an inkhel a, Mawitea’n goal sarih khung tawhin goal thun lova hun hman zawh tum khat chiah a nei a, mimala thun tam ber ni mekin, Thawhlehni zan khan semi-final second leg-ah tum hnih a pet lut a, Vaivakawn lakah goal thum goal khatin an chak a ni.
Sihphir Venghlun winger Ricky Lalramnghaka’n vawiruk an khelh tawhah goal ruk thun ve thungin, khelh khat an la neihah top scorer ni turin hun tha a nei a, quarter-final a zawh thlengin khung tam ber ni reng mah se goal thun lovin semi-final first leg leh second leg a hmang ral a, chutih rualin team goal nawr tichaktu pawimawh tak erawh a ni zui zel thung.
Sihphir Venghlun tan Lalmuansanga’n goal li thun tawh bawkin semi-final-ah a chetha hle a, Bethlehem Vengthlang nen vawihnih an inkhelh chhungin goal thum a khung a, second leg-ah hattrick siam theihna hun tha nei mah se penalty a chhuih lut lo.
Player tha ber chawimawina dawng thei turin mi pali chhawpchhuah an ni bawk a; Divya player of the match lawmman dawng tawhte atanga thliar sin niin, an khelhna khua leh veng mi ngei atangin technical board lamin an thlang thin a, veng emaw khaw dang emaw atanga lakluhte an huam teltir lo.
Best player ni thei turin Sihphir Venghlun attacking midfielder Joseph Lalthafela’n hun tha a nei a, Divya player of the match atan vawithum thlan a nih tawh bakah goal hnih a khung tawh a, a elpui Kawnpui midfielder Joseph Lalrinawma’n goal la thun ve lo mah se Divya player of the match lawmman tum hnih a dawng tawh a ni.
Chhawpchhuah zingah semi-final-a tla pahnih telin, Bethlehem Vengthlang captain Lalrammawia’n goal thum khungin Divya player of the match lawmman tum thum a dawng a; Vaivakawn foward Benjamin Lalnunpuia’n goal nga thunin Divya player of the match-ah vawi hnih thlan a ni bawk.