Tyga ‘Taste’-in diamond certification a dawng

2018 nipui laia Tyga hla hit ‘Taste’ featuring Offset chu Recording Industry Association of America (RIAA) chuan diamond-certification a dawng ta a, Tyga hla zinga RIAA diamond-certified hmasa ber a ni.
RIAA diamond-certified hla te hi US-a maktaduai 10 hralh theih chin tihna a ni a, RIAA chhut danah chuan digital song sale pakhat emaw, on-demand audio/video stream 150 emaw te chu hla pakhat hralh nena intluk a ni.
‘Taste’ hla hi Tyga album, 2019-a a tlangzar ‘Legendary’ atanga a lead single a ni a, a vanglaiin Billboard Hot 100 (singles) chart-ah No.8 a kai pha a, he chart-a a hla top 10 kai thei pathumna a ni. Tyga hian Chris Brown a feature-na ‘Loyal’ tih hla chu 2014 khan No.7-ah a lo lan pui tawh a, 2012-ah ‘Rack City’ chu No.7 tho a lo kaipui tawh bawk.
Tyga chuan X-ah a hlain diamond certification a kai chu lawmthu sawiin, “Taste pawh maktaduai 10 kan hralh tling ta…He hla lo stream-a lo twerk puitu zawng zawng chungah lawmthu ka sawi e,” tiin a tweet a, RIAA pawh a chhan let nan, “ #Taste hmangin RIAA Diamond certification i tem ve ta maw! @Tyga he mellung pawimaw tak i thleng thei hi kan lawmpui che,” an ti ve bawk.
Offset pawhin he thuthar hi a lawm hle a, “Khai le, hei chu ka tan thil ropui a ni e. Vawiinah diamond kan kai, Pathian hi a tha a ni,” tiin a tweet ve bawk.