Tylor Swift ‘TTPD’ kar 10 a No.1 ta

Taylor Swift album ‘The Tortured Poets Department’ chu Billboard 200 (albums) chart-ah a No.1 a, he chart-ah hian a zawnin kar 10 a No.1 tling ta. Hetihrual hian Gracie Abrams leh Peso Pluma te album thar pawh chart top 5-ah a debut ve ve bawk e.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralh zat bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Taylor Swift ‘TTPD’ hi kar khat chhungin 1,15,000 hralh lehin chung zinga 87,000 chu streaming atanga album tlukpui (on-demand of ficial stream maktaduai 113.21) niin, album tak tak hralh chu 28,000 a ni a, album-a hla mal hralhna atangin 1,000 a tling thei bawk.
Taylor Swift hian album he chart-a kar 10 chin No.1 ni thei pathum a nei tling ta a, a album hmasa ‘1989’ leh ‘Fearless’ te chu kar 11 ve ve an lo No.1 tawh bawk. Swift hi zaithiam zingah he chart-a kar 10 chin No.1 thei album pathum emaw a aia tam emaw nei thei pangana a ni a, hetiang tithei zaithiam dang te chu- Whitney Houston (album 3, 1986-93), The Beatles (album 4, 1964-67), The Kingston Trio (album 3, 1959-69) leh Elvis Presley (album 4, 1956-61) te an ni a, tun kum zabi tharah chuan Swift chiah hetiang ti thei hi a la awm.
Hetihian Taylor Swift album hrang hrang he chart-a No.1 tawhte No.1 hun chhung belhkhawm chu kar 79 a tling ta a, he chart-a soloist zinga No.1 ni rei ber a nihna a sawhnghet lehzual ta a ni. Swift hian chart No.1 kai thei album 14 nei tawhin, Jay-Z nih rualin, soloist zinga e chart-a No.1 kai thei album ngah ber an ni.
Gracie Abrams album thar ‘The Secret of Us’ chu 89,000 hralhin No.2-ah a debut a, streaming atangin 38,000 (on-demand official stream maktaduai 47.57), album tak tak hralhna 50,000 leh album-a hla mal hralhna atangin 1,000 a tling thei bawk.
‘The Secret of Us’ hi Gracie Abrams studio album pahnihna niin, he chart top 10-a a lan vawi khatna a ni. A album hmasa ‘Good Riddance’ chu March 2023 khan chart No.52 a lo kai ve tawh bawk a ni. Gracie Abrams hian a thiannu Taylor Swift ‘The Eras Tour’ chu April-August, 2023 khan opening act a neih sak thin a, hei hian a vawrh lar thar lehzual a, kumin October atanga Taylor Swift-i’n The Eras Tour US leh Canada-ah a neih leh turah pawh a zui leh dawn a, December ni 8-a Vancouver-a Swift final show-ah a inlan leh dawn bawk a ni.
Chart No.1 hlui Morgan Wallen ‘One Thing at a Time’ chu 73,000 hralh lehin No.4 atangin No.3 a kai thar leh tawh a, Billie Eilish ‘Hit Me Hard and Soft’ chu 70,000 hralh lehin No.2 atangin No.4-ah a tawlh ve thung.
Peso Pluma album thar ‘Exodo’ chu 64,000 hralhin No.5-ah a debut a, he chart top five-a lang thei album pahnih a neihna a ni. ‘Exodo’ hralhna hi streaming deuh vek niin, on-demand official stream maktaduai 87.51 a tling a, album tak tak hralhna leh album-a hla mal hralhna atangin 1,000 a tling lo deuh. He album-ah hian Anitta, Cardi B, DJ Snake, Eslabon Armado, Junior H, Quavo leh Rich the Kid te a thawhpuina hla te pawh a awm.
Chappell Roan ‘Te Rise and Fall of a Midwest Princess’ chu 61,000 hralh lehin No.8 atangin No.6-ah a insawn a, chart No.1 hlui Morgan Wallen ‘Dangerous: The Double Album’ chu 43,000 hralh lehin No.10 atangin No.7-ah a insawn thar leh a, chart No.1 hlui bawk Ariana Grande ‘Eternal Sunshine’ chu 41,000 hralh lehin No.23 atangin No.8 a kai thar leh ta bawk.
Charli XCX album ‘Brat’ chu 41,000 tling lo deuh hralh lehin No.9-ah bawk a la awm a, Shaboozey ‘Where I’ve Been, Isn’t Where I’m Going’ chu 40,000 hralh lehin No.12 atangin No.10 a kai thar ve leh ta bawk.