Tyson a chak lo

Mizorama inrinni zing khan boxer ropui Mike Tyson chuan kum 58 mi zet ni tawh chungin inhnek a hmachhawn a. Palian huanga champion thei naupang ber Tyson hi Jake Paul hneh lovin a tlawm.
Boxing a nih a, Mike Tyson telna a nih tawh phawt chuan ngaihven a hlawh a, a boruak a lian hle zel. Kum 58 mi zet ni tawh chunga tlangval tha za rual lek kum 27 mi Jake Paul a hmachhawn pawh hian ngaihven a hlawh leh viau a, a hmunah entu mipui sing sarih zet an pungkhawm hial a ni. Boxer ropui Tyson hian a thiamthil la theihnghilh lo mah se, a tuanin a phak tawh lo thung a, tlawm zawkah a tang.
Tyson hian Jake Paul lakah bul a tan tha a, round hmasa pahnihah mit la taka inlanin chak thei hmel a pu hial. Round thumnaa atangin a tha a zuai tan a, a kuttum thawhchhuak fur fur turin a tuanin a tlin tawh lo. Round thumna atang hi chuan inveng reng rengin hun a hmang a ni ber tawh. A taun fum hle tawh mah se round riatna thlengin a tlu em lova, knock out a pumpelh thei hram thung. Kum naupang te lakah tlu lova a ding tluan thei kha boxing a Tyson namai lohzia lantirtu tha tak a tlinga ngaih a ni. Jake Paul ngei pawh hian inhnek tawp dawn tepah Tyson zahna chet ze mawi tak a lantir ve bawk.
Inhnek a zawh hnuin result puan chhunzawm a ni a, endiktu pahnihin Jake Paul hi pont 79-73 in an chaktir a, endiktu pakhatin Paul hi dah chungnung zual hretin point 80-72 in a chaktir ve thung a. Youtuber lar Jake Paul chuan boxer ropui Mike Tyson lakah unanimous decision in hnehna a chang ta a ni.
Tarlan tawh angin palian huanga champion thei naupang ber Mike Tyson hi kum 58 mi zet a ni a ni tawh a, kum 19 chhung zet professional huangah inhnek a hmachhawn tawh lo bawk. Tar lam ni tawh chunga inhnek a hmachhawh leh a sum dinhmun a tlakchiat vang nia sawi a ni a. Jake Paul a hmachhawn vang hian US dollar maktabuai 20 vel zet a hlawhchhuak tura ngaih a ni.