U 15-ah Mamit an thiam ber

Mizoram Football Association (MFA) buatsaih MFA Inter District Junior Boys Football championship 2024 -25 chu March 28, Zirtawpni khan final khelh a ni a. Final hmuhnawm takah Mamit DFA in an khingpui Lawngtlai DFA chu 4-1 ngawtin an hneh a, Mizoram-ah U-15 a tham ber chu Mamit an ni.
Final-a inhmachhawn Mamit leh Lawngtlai te hi Group B-ah an awm dun a, Group match-ah Lawngtlaiin 3-0 ngawtin hnehna an lo chang tawh. Group stage-a an sawp tawh an nih vangin Lawngtlai hi champion turin an inringtawk viau a, champion tura rinkai zawk an ni. Final-ah khel chhe lem viau naa minute 22-na lekah si nghak Paul-a hnawhchhuah a nih vangin Mamit lakah chak nawn leh a harsa ta thung.
Inkhel pawimawh takah tam zawk an nih vangin Mamit an phur a, goal pawh an thun thuai. Paul-a chetsual vanga an hlawhchhuah free-kick chu Malsawmdawngkima chuan mawi zetin a pet goal a, minute 25-naah hmahruaina goal a thun. Tam zawk an nih bakah goal thun hmasa zawk an nih vangin Mamit in champion an hnaih leh zual.
Tlem zawk chungin si phur zawkah tan mah se Lawngtlaiin champion phu an nihzia an lantir a, chawlhlawk hmain goal an thun a, an si phurh an sut. Lawngtlai tan hian Kenedy Laihlunsanga chuan minute 42-naah goal a thun a, 1-1 a inhnehtawk chungin chawlhlawk an hmang.
Chawlhlawk hmain chungnung zawk awm thei lo mah se chawlhlawk hnu lamah player tlem zawk Lawngtlai an chau a, an goal venghim tur leh goal thun turin tih theih an neitam tawh lo. Goal thun ngei tuma tan khawh Mamit tan hian Joel Lalhriatdika chuan minute 69-naah hma an hruai nawn lehna goal a thun a. Minute 74-naah Lalruathlua chuan an goal thumna a thun zui leh a, an hmahruaina a tizauh belh. 3-1 hma an hruai reng hnuin final-a goal hmasa ber thuntu Malsawmdawngkima chuan minute 90+1-ah Mamit goal lina thunin a tawp a khar. Best player ni zui ta Malsawmdawngkima goal thun hnu hian goal dang a luh belh thei tawh lova, Mamit chuan Group stage-a an heh loh Lawngtlai lakah phuba an la a, ropui takin an champion zui ta a ni.
Final-a intum Mamit leh Lawngtlaite hi Group B-ah, Lunglei, Kolasib leh Khawzawl te nen an awm tlang a. Rin phak baka chetha Mamit leh Lawngtlaite hian Group A atang tlang Saitual leh Serchhip chu semi-final-ah an hneh zui leh a. Intawng nawn leh turin final an lut. Final hmuhnawm takah Lawngtlangiin tlem zawk an nih an tuar a, uiawm takin an champion zo ta lo a ni.
MFA Inter District Junior Boys Football championship 2024 -25 khelh zawh takah hian Mamit champion puitu Malsawmdawngkima chu ‘Best player’ ah thlan a ni. Mamit tan goal 11 zet thuntu Joel Lalhriatdika chu top-scorer a ni a. Final lut zo ta lo Saitual chuan fairplay award an dawng ve thung.