UCC a tribal te huamtir loh thlawp

Rashtriya Swayamsewak Sangh (RSS) a inziaklut tribal body Vanvasi Kalyan Ashram (VKS) te chuan BJP MP Sushil Kumar Modi, Chairman of the Parliamentary Standing Committee on Law in Uniform Civil Code (UCC) tribal te huamtir loh a rawt chu an tlawp thu an sawi a.
VKS te chuan tribal community te leh aiawh te chuan UCC hnuaiah an customary practice leh tradition te humhim a nih theih nana Law Commission hnena rawtna thlen turin an ti bawk.
Sushil Modi hian Law Commission member te leh parliamentary committee member tena meeting an neihnaah North-East a tribal te leh India ram hmun danga tribal te chu UCC huamtir ve loh ni se tiin rawtna a siam a ni. Tribal mite customary tradition te chu sakhaw dang leh community dangte nena hrang hlak tiin a sawi.
Satyendra Singh, vice-president, VKS chuan UCC kaihhnawihah social media ah information dik lo thehdarh mek niin chu chu tribal community te kaihhnawih hriatfiah hartak a nih thu a sawi a. VKS te chuan tribal socoiety te chu a bik takin an socio-cultural organisation leh educated classes te chu hlauhthawnna tur an nei lo tiin a sawi bawk.
“Tun dinhmunah phei chuan sorkarin eng nge a tih dawn hriat pawh a la ni lo. Tribal society leh pawl tena UCC avanga an customary practices leh system te a nghawng chhe dawna an hria a nih chuan Law Commission hnenah an hrilh hre tur a ni” tiin Singh chuan a sawi.
VKS chuan Law Commission te chu tribal area te tlawha mipuite nena inkawmhona neia an thil thlir dan leh ngaihdan kimchang hria a, chumi hnuah sorkar a report pe turin an ngen bawk.
“Law Commission hian tribal community te traditional system an hriatthiam a ngai a, a bik takin inneih, inthen, fa lak leh ro chhawm chungchangah te a ni bik zual a, hmanhmawhin an kal tur a ni lo” tiin a sawi bawk a. VKS te pawhin UCC bill chhawpchhuah a nih hnuah ngaihdan an thawh tur thu a sawi bawk.
22nd Law Commission of India chuan June 14 khan stakeholder hrang hrangte public leh religious organisation te pawh UCC an ngaihdan hrilh turin a ngen a ni.