UCL-ah Arsenal an chak vek

Nilaini zan khan UEFA Champions League 2025-26 – League round khelh zawh a ni a, Arsenal chuan a mikhual Kairat Almaty chu 3-2a hnehin table chung ber luah chungin league round an khar. Arsenal hi vawi 8 ngawt an chak zawn a, UCL League round-ah chak vek awmchhun an ni. Inkhel dangah Newcastle United in Paris St Germain mualah tlawm an pumpelh a, play-off khel turin an tling ve bawk.
Arsenal B team an chak
Champions League table chung ber luah a, pa hnihna aia hniama awm thei tawh lo Arsenal hian table hnuai ber luaha tla chiang tawh Kairat Almaty an mikhual a. An mikhual Kazakhstan club lian Kairat lakah manager Mikel Arte-a chuan a player thate a awltir a, an B team anga ngaih theihte a chhawr. Kairat lakah hian hliam vanga chawl reng Kai Havertz pawhin bul a tan a, goal a thun bakah assist a nei nghe nghe. Tunhnaiah hliam vanga chawl Ricardo Calafiori chu centre-back-ah a chawr bawk. Manchester United an hmachhawn tuma bul tan zingah Kairat laka bul tan an awm lo. Chuti chung chuan Gunners B team te hian 3-2 in Kairat an hneh tho thung. Hei hian Arsenal squad chhahzia a lantir.
Arsenal hian an mikhual Kairat Almaty lakah bul an tan tha viau a, inkhel tan atanga minute thumna lekah Viktor Gyökeres chuan Kai Havertz siamsak chu um tlangin fuh zetin a pet goal a, hmahruaina goal a thun nghal. Hma takah goal an thun vangin phur viau mah se Arsenal an phur rei lo. Goal hmahruai an thun atanga minute lina lekah Ricardo Calafiori chuan penalty a chawi. He penalty hi Arsenal midfielder hlui Jorginho chuan si nghak Kepa rin lohna lamah awlsam takin a pet goal a, an si phurh a sut.
Hma takah goal hnih a lut hi inkhel tihmuhnawm zualtu a ni a, goal dang pawh a luh belh leh thuai. Fuh taka an mikhualte an nawr tlang hnuin Kai Havertz chuan minute 15-naah mawi takin a pet kual lut a, an goal hnihna a thun a, Gunners in hma an hruai nawn leh. Arsenal goal hnihna thuntu Havertz hi hliam vangin a chawl reng a, bul a tan lehna hmasa berah ni 357 zet hnuah goal a thun zui leh chat a, goal hmangin rin ngam a nihzia a lantir nawn leh.
Hma an hruai nawn leh hnuin inrintawkna sang zawk nen Arsenal an inlan a, an khel tha zui hle. Chawlhlawk dawn hnaih minute 36-naah Gabriel Martinelli chuan Havertz siamsak tha tak chu awlsam takin a pet goal a, an goal thumna thunin an hmahruaina a tizau.
Chawlhlawk hnu lamah inkhel a hmuhnawm zui viau a, Arsenal khelh a hmuhnawm thei hle. Gunners hian goal thun belh tumin an khingpuite nawr zui viau mah se goal dang an thun belh thei tawh lova, hun tawp dawp hnaihah goal an chhuah belh tlat thung. Hun pangngai tawk hnu, hun pek belh tawp dawn hnaih minute minute 90+4-ah Ricardinho chuan goal thunin Kairat si phurh sut then bawk mah se tlawm an pumpelh zo ta chuang lova, League round-a tute mahin an hneh theih loh Arsenal lakah an tlawm ve leh ta nge nge a ni.
Kairat Almaty lakah an chak leh tak vangin Arsenal chuan table chung ber luah chungin League round an khar. Table chung ber an luah vangin last 16 khelh hunah second leg chu an mualah an khel ngei dawn tih a chiang zui nghal bawk. Arsenal hi vawi riat ngawt an chak zawn a. English club zingah Champions League-a chak zawn rei ber dawttu an ni a, an chunga awm Manchester City chu vawi 10 an lo chak zawn tawh. Arsenal in table chung ber an luah laiin Kairat Almaty erawh chuan khelh 8 atanga point 1 hmuin table hnuai ber an luah nghet ve thung a, an tla chiang hle.
Newcastle in PSG an chelh
Arsenal in Kairat an mikhual laiin English club dang Newcastle United chuan Mimualah champion lai Paris St Germain an hmachhawn ve thung. Magpies hian champion lai PSG chelhin 1-1 in an inhnehtawk. PSG lakah tlawm an pumpelh vangin last 16 play-off an khelh theih phah a, result tha tak a ni.
Champion lai PSG hian Parc des Princes-a an mikhual Newcastle United lakah bul an tan tha viau aa, midfielder chetha tluang tak Vitinha chuan inkhel tan atanga minute 8-na lekah hmahruaina goal a thun nghal. Hma takah goal an thun vangin Luis Enrique-a team te an phur a, direct-a last 16 lut ngei tura ngaih an ni hman hial a, dinhmun tha takah an ding.
PSG hian thatho takin an mikhualte nawr zui viau mah se goal an thun belh thei lova, chawlhlawk hmain goal an chhuah ta tlat zawk. Newcastle United tan hian Joe Willock chuan goal thunin an si phurh a sut. Chawlhlawk hmaa goal hnih lut bak hi goal dang a luh belh thei tawh lova, PSG chu uiawm takin an mualah an chak zo lo.
An mualah an chak zawh loh vangin PSG hian last 16 play-off an khel zui a ngai dawn a. 12-naa awm Newcastle United pawhin play-off an khel zui ve dawn bawk.