UCL ah Arsenal in PSV an sawp

March 4, Thawhleh zan khan UEFA Champions League (UCL) Last 16 khelh tan a ni a. English Premier League club lian Arsenal chuan mikhual an nihna hmunan 7-1 ngawtin mualneitu PSV Eindhoven an sawp a, quarter-final lut tluk an ni der tawh. Gunners hian champions league knock-out round bikah Mimuala hnehna chang chiang ber record an siam. Arsenal an chak rual hian champion lai Real Madrid pawhin an elpui lian Atletico Madrid an hneh ve bawk.
Laipui mu a sur Philips Stadion a lenglut Arsenal in mualneitu PSV lakah bul an tan tha viau a, chawlhlawk hmain goal thum ngawt an thun hman. Gunners tan hian Jurriën Timber chuan minute 18-naah hmahruaina goal a thun. Goal thun hmasa zawkah an tan vangin Arsenal an phur viau a, inrintawkna sang zawk nen inlanin goal an thun belh leh thuai bawk.
Timber goal thun atanga minute thum hnu lekah rawlthar duhawm Ethan Nwaneri chuan an goal hnihna a thun zui leh zat. Inhnaichilh taka goal an chhuah zawn vangin PSV an buai a, Gunners an huangtau ve thung. Si hniha hmahruai tawh Arsenal tan hian minute 31-naah Mikel Merino chuan an goal thumna a thun zui leh a, darkar chanve an khel chuang awrh tihin si thum faiin hma an hruai hman der tawh. Goal thum an chhuah zawn hnuin PSV hi chawlhlawk dawn haiah an cheduh a, penalty an hmu. He penalty hi Noa Lang chuan a pet goal a, an si phurh a sut then. Gial chhuah bawk mah se Arsenal hian 3-1 a hmahrua chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal an thun belh leh thuai. Second half tan atanga minute hnihna lekah captain Martin Ødegaard chuan an goal lina a thun a. Player of the match a thlan zui tak Odegaard hian minute 73-naah an goal ngana a thun belh zui leh bawk.
Gunners tan hian Leandro Trossard leh defender Riccardo Calafiori ten goal an thun belh leh bawk a, PSV mualah lai Pui a puak ulh ulh a, Laipui mu a surin a sur sung sung a ni ber mai. Inkhel tawp thlengin goal dang a luh belh tawh lova, Arsenal chuan Mimualah 7-1 ngawtin hnehna an chang zui ta a ni.
PSV mualah 7-1 ngawta hnehna chang Arsenal hi Champions League knock-out stage bikah Mimuala chak chiang ber record thar an siam ta hial a ni. Mimualah 7-1 ngawtin an chak a, an muala inkhel zui leh tur an nih vangin Arsenal hi quarter-final lut tluk an ni tawh a. Awlsam takin quarter-final an lut ngei dawn niin a lang. Gunners hian quarter-final an lut a nih pawhin Real Madrid leh Atletico Madrid te inkhela chak zawk zawk an hmachhawn dawn a, fiahna hautak zawk an hmachhawn zui a ngai ngei dawn a ni.
Real pawh an chak
Thawhleh zana inkhel ngaihven hlawh tak Madrid derby-ah UCL-a champion lai Real Madrid chuan an elpui lian Atletico Madrid chu 2-1 in an hneh a, pen khatin quarter-final an hnaih ve bawk.
Santiago Bernabeu-ah Real Madrid in bul an tan tha viau a, inkhel tan atanga minute lina lekah Rodrygo chuan hmahruaina goal a thun nghal. Hma takah goal chhuah mah se Atletico Madrid tan Julian Alavaraz chuan minute 32-naah goal thunin an si phurh a sut a, 1-1 a inhnehtawk chungin chawlhlawk an hmang. Chawlhlawk hnu lamah Real Madrid tan hian Brahim Díaz chuan minute 55-naah hma an hruai nawn lehna goal a thun a, he goal hi Atletico Madrid lakah an chakpui zui ta a ni.
Thawhleh zana inkhel dangah EPL club Aston Villa chuan mikhual an nihna hmunah 3-1 in mualneitu Club Brugge an hneh a, quarter-final an hnaih ve kuarh bawk. Mimualah Villa in hnehna an chan lai hian Borussia Dortmund leh an mikhual Lille te chu 1-1 in an inhnehtawk ve thung.