Smith-a ODI career a tawp fel ve ta…

Smith-a ODI career a tawp fel ve ta…
Champions Trophy final lut zo loa Australia an tlak rualin kum 35 mi Steve Smith chuan one-day international cricket a chawlhsan ve nghal a, ram tana Test leh T20 khel tur chuan a la inhawng a, Australia tana koh a nih leh nih lohah a innghat ang.
Tunkar Thawhlehni khan Pat Cummins awm loh vangin Smith hian captain nihna a chelh a, a ho hian Dubai khawpuia Champions Trophy semi-final-ah wicket li zetin Australia chuan India an hneh lo a, kha kha ram tan ODI-a Steve Smith inlan tawpna a ni dawn ta.
Smith hian kum 2010 khan Australia tan ODI debut a khel a; 50-over career-ah ram tan match 170 atangin century bawi 12 a siam tling a, kum 2015 leh 2023 khan ODI World Cup-ah a ram a champion-pui nghe nghe.
Sussex batsman hlui Smith hi kum 2015 leh 2021 khan Australian men’s ODI player of the year atan thlan niin, MCG-a 2015 ODI World Cup final-ah khan winning boundary hlapin New Zealand lakah Australia a chakpui a; kum riat hnua Australia-in ODI World Cup final-a rinkai zawk India an hnehna kawngah pawh player thawhhlawk ni lehin, kha mi kum kha a vawirukna atana Australi-in ODI World Cup trophy an hawnna a ni nghal.
Smith hian a ODI career-ah run 5,800 siam tlingin, a average chu 43.28 a ni.
Match khata a score hnem ber tum chu kum 2016 daih tawha New Zealand laka run 164 a hlap chhuah kha niin, SCG muala a ropuina kha a kum khaw sawi a tling ve tawh dawn a ni!