UCL-ah City an tlawm

English team lian Manchester City in result duhawm lo tak an nei chhunzawm a, an elpui lian Manchester United laka an tlawm hnu lawmah Bodo/Glimt hneh lovin an tlawm zui leh nghal. Team lian City in insiamthat an mamawh hle.
Club lian Manchester City hi Norway club Bodo / Climt hmachhawn turin Aspmyra Stadion-ah an leng lut. Mikhual an nihna hmunah an che fuh lo hle a, goal thum ngawt an chhuah bakah an player pawimawh Rodri hnawhchhuah a ni bawk. Norway club hian fuh zetin an khingpuite an nawr let thut a, Blomberg cross tha tak chu Kasper Waarst Høgh chuan minute 22-naah fing zetin si nghak Donarumma kap karah a tauh goal a, hmahruaina goal a thun.
Goal an chhuah hnuin City in an si phurh sut thuai tumin an khingpuite an nawr a, an chesual zui leh tlat thung. Bodo / Glimt in fuh takin an nawr let nawn leh a, rawlthar defender Max Alleyne tihsual vanga hun tha zawk nei zui lehin goal hmahruai thuntu Høgh chuan minute 24-naah awlsam taki a pet goal zui leh a, City laka an hmahruaina a tizau. Høgh goal thun hmang hian Bodo in City lakah 2-0 a hmahruai chungin chawlhlawk an hmang.
Chawlhlawk hnu lamah mualneitu Bodo/Glimt an khel tha chhunzwm a, goal thun hmasa zawkah an tang leh. Minute 58-na lekah Jens Hauge chuan an goal thumna a thun. Si thum an phurh hnuin City tan Rayan Cherki chuan minute 60-naah goal thunin an si phurh a sut then. Goal an thun vangin phur thar bawk mah se minute 62-na lekah Rodri hnawhchhuah a ni a, City tan thawhchhuah ngaihna reng reng a awm tawh lo va, mak takin an tlawm zui ta a i. Bodo / Glimt hian English club an hneh hmasak ber chu Manchest er City hi an ni zui ta nghe nghe a ni.