UCL atangin Inter Milan an tla

Thawhleh zan khan UEFA Champions League (UCL) last 16 play-off second leg khelh a ni a, Italian Serie A club lian Inter Milan chu Norway club Bodo/Glimt lakah an tlawm nawn leh a, last 16 lut zo lovin an tla. Inter Milan an tlawm nawn a, an tlak lai hian English club Newcastle United erawh chu an chak nawn ve thung a, hnehna lian changin last 16 an lut ve thung.
Inter an tlawm nawn
Italian Serie A-ah point 10 zeta sang fal a, season liam ta champions league-a finalist ni bawk Inter Milan hi Norway club lian Bodo/Glimt muala an lenluh tumin 3-1 ngawtin an lo tlawm tawh a, Mimualah an mualpho hmasa. Play-off thawhkhatnaah tlawm bawk mah se an muala inlan leh tur an nih vangin chak let theih beiseina lian tak an nei a, last 16 luh ngei an la inring hle. Beiseina sang tak nen an mualah inlan bawk mah se mak tak maiin an tlawm nawn leh teh tlat a, champions league atangin hnawhchhuah an ni a, an puantuah an tel fel zui ta a ni.
An mualah chak mamawh tak chunga inlan Inter Milan hian an khingpuite nwr nghal chat a, goal thun theihna hun tha an nei zawn. Tauh luh theihna hun tha tak an neih chu uiawm takin an hlah a, Dimarco shot hlauhawm zet pawh Bodo/Glimt si nghak Nikita Haikin chuan pui zetin a lo dang bawk. Inter hian corner atangin goal an thun teuh viau bawk a, Norway club hi derthawng tak chungin an him hram hram zel a ni ber mai.
Chawlhlawk hmaa bet deuh reng a, goal chhuah teuh thei tak Bodo/Glimt hi chawlhlawk hnu lamah an khel tha ta viau thung a, goal thun hmasa zawkah an tang ta hial. Inter Milan tlarhnung tihsual vangin goal thun theihna hun tha zet mai an nei a. An hun tha neih hi an chhawr tangkai a, Yan Sommer dan per chu Jens Petter Hauge chuan minute 58-naah awlsam takin a pet goal a, hma an hruaina goal a thun. Si hniha hma an hruai tawh bakah goal thun hmas zawk an nih leh vangin Bodo/Glimt dinhmun a tha tak zet tawh.
Si thum lai an phurh vanga dinhmun chhe taka ding tawh Inter Milan in insiamthat mamawh viau mah se an insiamtha hleithei chuang lo. Goal thun teuh viau mah se an tana ni tha a ni hlawl lova, mak tak maiin an hun tha an hlah nawn leh. Inter Milan in an hun tha neih an hlah tlut tlut laiin Bodo/Glimt in an hun tha neih an chhawr tangkai nawn leh a, goal an thun belh leh keuh thung. Fuh taka an khingpuite an nawr tlang hnuin Norway club tan hian Hakon Evjen chuan minute 72-naah awlsam takin a pet goal a, an goal hnihna a thun a, an hmahruaina a tizau.
Goal an chhuah belh leh cheu vangin Inter Milan dinhmun a chhe tak zet tawh a, thlana phumbo ang hial an ni tawh. Dinhmun chhe taka ding bawk mah se an mualpho lutuk tur hliahkhuh nan tal goal thun tumin tan an khawh zui nasa viau thung a, goal an thawkchhuak ve ta nge nge. Inter Milan tan hian Alessandro Bastoni chuan minute 76-naah goal thunin an si phurh a sut then. An si phurh an sut then vangin phur thar bawk mah se goal dang erawh an thun belh thei tawh lova, Bodo/Glimt ngam lovin an tlawm nawn ta nge nge a ni.
Manchester City leh Atletico Madrid lo hneh tawhtu Bodo/Glimt chuan Italian Serie A club lian Inter Milan chu si belhkhawmah 5-2 ngawtin an hneh a, mak leh ropui takin last 16 an lut zui ta a ni.
Newcastle an chak nawn leh
Thawhleh zana inkhel dangah English club lian Newcastle United chuan Mimualah 6-1ngawta an lo hneh tawh FK Qarabag chu 3-2 in an hneh nawn leh a, si belhkhawmah 9-3 ngawta hnehna changin last 16 an lut.
Mimualah chiang zeta hnehna chang tawh Newcastle United hian an mual St James Park-ah Bul an tan tha viau a, Inkhel tan atanga minute ruk chhung lekin goal hnih an thun leh hman der. Magpies tan hian inkhel tan atanga minute lina lekah Sandro Tonali chuan hmahruaina goal a thun nghal. Hma takah goal an thun a, si belhkhawmah 7-1 ngawta hma an hruai vangin an dinhmun a tha viau a, an inringtawk viau bawk. Hmahruaina goal an thun atanga minute hnih hnu lekah Joelinton chuan an goal hnihna a thun zui leh zat bawk.
Hma takah goal hnih a luh zawn hnuin Sven Botman chuan Newcastle goal thumna a thun zui leh a. FK Qarabag tan hian Elvin Cafarquliyev leh Camilo Durán ten goal thun ve bawk mah se result a tidanglam phak tawh lova, chiang zeta tlawmin an tla zui ta tho a ni.