UCL khel tur Arsenal

Pathianni zan khan English Premier League khelh chhunzawm a ni a, an muala hnehna chang Arsenal chu season tharah champions League khel turin an tling. Inkhel dangah Nottingham Forrest in hnehna an chang a, champions league khelh phak beiseina sang zawk an nei thar ve leh bawk.
Table-ah pahnihna luah mektu Arsenal hian Emirates Stadium-ah pathumnaa awm mek Newcastle United an mikhual a, season kal meka an heh theih loh Newcastle lakah fiahna hautak an hmachhawn. Inkhel pawimawh takah Gunners hian Declan Rice goal thun hmangin hnehna an chang a, seaspn thara UEFA Champions League khel turin an tling. He inkhel hmuhnawm taka Arsenal chakna goal hi minute 55-naah Declan Rice-atn pui taka a thun a ni.
Arsenal nen an inkar tizim leh zual tura chak mamawh Newcastle hian an si phurh sut ngei tumin tan an khawh a, goal thun theihna hun tha nei bawk mah se EPL si ngak tha ber ni mek David Raya an paltlang zo lo. Arsenal tana chetha zet mai David Raya hi player of the match ah thlan a ni nghe nghe a, team chhanhimtu dik tak a ni. An mualah an chak vangin Arsenal hian top 5 huang an luah ngei dawn tih a chiang nghal. Season tharah EPL club panga in champions league an khelh dawn vangin Arsenal hi UCL khel turin an tling a. Pahnihna ni chungin season an khar thei dawn em tih a la chiang lo thung. Gunners hi pathumnaa awm mek Newcastle United tan lehpelh theih ni tawh lo mah se Manchester City in an lehpel thei thung.
Pathianni zana inkhel dangah season kal meka chetha tak Nottingham Forrest chuan mikhual an nihna hmun London Stadium-ah 2-1 in mualneitu West Ham United an hneh a, champions league khelh phak beiseina sang zawk an nei thar.
Nottingham Forrest hian mikhual an nihna hmunah bul an tan tha a, inkhel tan atanga minute 11-na lekah Morgan Gibbs-White chuan hmahruaina goal a thun nghal. Hma takah goal lut mah se goal a luh belh thei lo vang vang. Goal a luh belh theih lawk loh hnuin minute 61-naah Nikola Milenkovic chuan Nottingham Forrest goal hnihna thunin an hmahruaina a tizau. West Ham tan Jarrod Bowen chuan hun tawp dawn hnaih minute 86-naah goal thun bawk mah se an si phurh an sut zo thei lova, an mualah an tlawm.
Hammers lakah an chak vangin Nottingham Forrest hian top 5 huang luah phak beiseina thar an nei. Forrest hian khelh 37 atanga point 65 hmuin pasarihna an luah mek. EPL season khar nia result a zirin pathumnaah ni thei dinhmunah an ding a, top 5 huang luah phak tumin an inel nasa hle. Pathuamnna awm mek Newcastle United in point 66 an hmu mek a, Chelsea, Aston Villa leh Manchester City te pawh UCL khel phak thut thei, an chak loha top 5 huang luah phak lo thut thei dinhmunah an ding hlawm. An zingah hian Manchester City in an khel tlem ber a, top 5 huang luah theihna hun nei tha ber an ni mek rih.