UD&PA hnuaia hna thawh mek tlawh

UD&PA hnuaia hna thawh mek tlawh
Urban Development & Poverty Alleviation Department hnuaia Aizawl leh a chhehvela hnathawh mek hmun 10 ami chu Inrinni khan a changtu minister K Sapdanga hoin department hotuten mini bus-a inphurin an tlawh.
Hualngohmuna bawlhhlawh sawngbawlna hmun siam, Solid Waste Management Centre hi a tirah bawlhhlawh sawngbawlna atana duan ni mah se, in sakna atana chak chhia leh in thiahna sawngbawlna hmun, atan ruahman a ni ta zawk a. SASCE 2021- 2022 a cheng nuai 1664 senga sak tur niin Mizoram PWD chu implementing agency an ni a, contractor chu V Lalbiakzama, College Veng a ni. 2023 April 7 atanga hna tanin, zaa thawh zawh tawh a ni a, kumina zawhfel beisei a ni. Heng in sakna chak chhia leh in thiahna sawngbul hnu hi in sakna atana hman nawn theiha chhuah (recycle) dan sawiho a ni.
ASCL hnuaia Hlimen khelmual sak mek an tlawh a, he khelmual hi cheng vaibelchhe 10.62 senga sak tur niin, contractor chu M/s Lalhming Infrastructure & Construction Pvt. Ltd. a ni. 2022 April-a hna tan a ni a, zaa 98 thawh zawh tawh niin, kumin February28 hian zawh an inbeisei.
ASCL hnuai bawk, Mission Veng-a New Age Multifaceted Urban Centre an tlawh chu SASCI atanga cheng vaibelchhe 9.51 senga sak tura duan a ni a, 2024 October 30 khan tender chhuah a ni a, contractor chu Kings & Prophets a ni. 2025 March 17-ah hna tan a ni a, zaa 10 zawh tawh niin, 2027 March 16-a zawhfel hman beisei a ni. Auditorium Hall, chowkidar quarters, store room, workshop, store pali., e-library room, Learning Centre Room, Old Age Recreational Room, conference room /meeting room, badminton court pathum, mini gym/ common green room; mortor parking awm tura ruahman a ni.
Hunthar by-pass road tur, Hunthar thlanmual atanga Govt. Hunthar Middle School inkar ami, cheng vaibelchhe 17 senga siam tur chu M/s J&L Associates-in a thawk a, kawng hi metre 3367-a thui tur niin, Hunthar Veng huamchhung national highway a lei tlahniam thinin Mizoram pum tan harsatna tamtak a thlen thin a ziaawm deuh theihnan hun rei tak ata rawtna lo awm tawh chu SASCI atangin tihhlawhtlin tum mek a ni a. He kawng hi tha taka tih tlang a nih hunah chuan kawng tam taka hman a nih beisei a ni a, Aizawl khawpui zauh belhna a nih piahlamah leimin nasatna hmun helna a nih dawn avangin a tangkai hle tura rin a ni. He kawng hi lirthei te (medium vehicle) chin tlan theihna tura ruahman a ni
ASCL hnuaia Aizawl New Market, Dawrpuia City Centre sak mek pawh UD&PA minister hian a tlawh a. Cheng vaibelchhe 41.59 senga sak tur a, contractor chu M/s Lushai Engineers niin October 2022-a thawh tan a ni a, hna zaa 72 zawh tawh niin kumin December-ah zawhfel an inbeisei. City Centre-ah hian dawr (stall) 1102 a awm dawn a, mihring leh bungrua bik tan lift ruahman niin, cold storage, CCtV, AtM, food court, office leh conference room bakah lirthei dah theihna tur parking area a awm.
UD&PA minister tlawh dangte:
8 thangfala Pawl building Chawnpui bula storm drain cheng nuai 93.92 senga siam tura duan a ni a. Eastman Consultancy contractor niin, hna zaa 30 zawh a ni tawh. ARDECO Design Build-in consultancy hna a thawk a ni.
8 Chawnpui Vengthlanga K Sangthuami building leh MINECO Road inkara storm drain, cheng nuai 79.70 senga siam tur a ni a. Senhri Agency chu contractor niin, hna zaa 70 zawh a ni tawh. ARDECO Design Build-in consultancy hna an thawk a ni.
8 Zotlang Green Cemetery cheng nuai 485.34 senga sak tur a ni a. tIBERIA-in a hna thawkin zaa 30 zawh a ni tawh. Chhungkaw 165-in phum theihna tur RCC burial vault ruahman a ni a, seepage pit awmin, vault khatah a tam berah ruang 7 phum theih tura duan a ni. Minister chuan Aizawl khawpui chep takah ram dang, hmun dang tichereu loa Zotlang-in hmun khata inphum theihna an nei chu tha a tih thu sawi a ni.
8 Hunthara NH108 thlanga Storm Drain hi cheng nuai 777.16 senna tura duan a ni a. Vaube Projects chu contractor niin, hna zaa 20 an zo tawh a. ARDECO Design Build-in consultancy hna a thawk.
8 Vaivakawn thlanmual thar panna kawng leh Maumual huamchhunga inkalpawhna kawng siam a ni a, hna hi A/E Construction-in changin, 2025 October 22 atanga thawh tan niin, thla 18 chhunga zawh hman tum a ni. Lei laih hna (earth work) kar hnih chhung thawh a ni a, 2025 December 8 atangin RCC kawng chhun tan niin, ni 22 chhung chhun a ni a. 2026 February 5 khan chhun zawh a ni.