Ui chi 24 lakluh loh tur siam

Lunglei district-ah vulh turin ui chi 24 chu Lunglei district chhungah lakluh, inthlah pun tir, vulh leh hralh a nih loh nan district magistrate hminga khapna thupek chhuah tum a ni.
July 26 khan Lunglei addl DC James Miahlung hoin sawrkar laipuia Animal Husbandry & Dairying Department hnuaia Expert Committee-in ui kawlh leh mihring nunna tiderthawng thei nia an tarlan ho chu an district-a lakluh, inthlah pun tir, vulh leh hralh khuahkhirhna kawnga hma lak dan tur an sawiho a. Lunglei Municipal Council, Police, AH&Vety, I&PR leh Local Council Association aiawhte bakah Lungleia ran enkawlna dawr/ clinic neitute an tel.
Addl DC chuan India ram hmun hrang hrangah leh Lunglei khawpuiah ngei pawh ui seh vanga mihring tuarna a thleng fo tih sawiin, hei vang hian sawrkar laipuiin ui kawlh leh mihring nunna tiderthawng thei nia an hriat ui chi (breed) thenkhat leh a thlah pawlh (crossbreed) te ram chhunga lakluh, inthlah pun tir, vulh leh hralh khap turin rawtna a siam a; chumi bawhzui dan tur ngaihtuaha thukhawm an ni tih a sawi.
Lunglei bika ran khuahkhirhna chungchang chu LMC-in inkaihhruaina fel tak a neih hunah an kenkawh tur a la ni dawn tih sawi niin, chumi hmaa hma lo lak lailawk dan tur ngaihtuah a tul thu sawi a ni a. AH&Vety department aiawh leh pet care neitute hnen atangin Lungleia ui kawlh chi vulh leh inthlah pun tir a nih dan report a ni a; sawrkar laipui thuchhuak tha taka kenkawh a nih theih dan tur leh ui seh vanga mihring leh ran tawrhna thleng thei venna tura ui khuahkhirh kawnga hma lak dan tur rawtna hrang hrang sawi ho a ni.
Sawrkar laipui AH&D department hnuaia Expert Committee-in ui kawlh leh vulh atana him lo nia a tarlan chu – Pitbull Terrier, Dogo Argentino, Rottweiler, Wolf dogs, Tosa Inu, American Staffordshire Terrier, Fila Bradileiro, American Bulldog, Boerboel, Kangal, Central Asian Shepherd Dog (ovcharka), Caucasian Shepherd Dog (ovcharka), South Russian Shepherd Dog (ovcharka), Tornjak, Sarplaninac, Japanese Tosa and Akita, Mastiffs (boerbulls), Terriers, Rhodesian Ridgeback, Canario, Akbash dog, Moscow Guard dog, Cane corso leh Ban Dog (Bandog) ang chi a ni.
Heng ui hi lakluh, inthlah pun tir, vulh leh hralh a nih loh nan district magistrate hminga khapna thupek chhuah tura rel a ni a. Magistrate, Police leh Local Council nen a huhoin ui khuahkhirhna zawm a nih leh nih loh enfiah turin thawh chhuah nise, tih a ni.