UK leh India-in sumdawnnaa inremna lian siam

UK leh India-in sumdawnnaa inremna lian siam
UK leh India chuan sumdawnnaah inremna siamin UK firm-te tan India-a whisky, car leh thil dang thawn luh a awlsam sawt ang a, India thawmhnaw leh pheikhawk thawn chhuaha chhiah lak thin tihtlem a ni bawk ang.
UK sorkar chuan ‘chhinchhiahtlak’ tiin a sawi a, inrem tur hian kum thum buaipui a ni a. Immigration policy tihdanglam a ni lo va, hei hian Indian zirlaite UK-a an zir pawh a huam ang.
Prime Minister Sir Keir Starmer-a chuan inremna hian thanna a pe ang a, ‘British mipui leh sumdawnna tan rah tha’ a chhuah tur thu a sawi.
Nikum khan UK leh India inkara sumdawnnaa sum che hi £ tluklehdingawn 42.6 a tling a, inremna thar hnuaiah hi chuan thang zelin kum 2040-ah phei chuan £ tluklehdingawn 25.5-a a pun beisei a ni.
Indian Prime Minister Narendra Modi-a chuan inremna chu mellung chhinchhiahtlak a nih thu sawiin ‘inhriat thiam tawnna hlawk leh tumna lian tak’ a nih thu a sawi.
Inremna hian ‘ram pahnih tan sumdawnna, investment, thanna, hna siamna leh thil thar chin kawngah rah tha a chhuah dawn’ niin Modi-a hian X-ah a tar lang.
Inremna hi a taka hmang tur chuan kum khat vel a duh dawn thung a, Department for Business chuan UK mipuiten India atanga bungraw lutah chhiah tlem zawk a awm tur chu an chhawr dawn tih a sawi.
Bungaw lak luhnaa chhiah lak tihtlem tur zingah puan leh pheikhawk, ei tur leh frozen prawn leh tlereuh te pawh a tel.
UK sorkar chuan India-ah thil thawn chhuah a pun dawn avangin economy a thang ang a, hna pawh a tam dawn tih a sawi.
India-a UK bungraw lut zinga chhiah lak tihtlem tur zingah gin leh whisky, aerospace, electrical leh damdawi hmanrua, vun chei mawina, ei tur zingah beram sa, salmon, chocolate leh chhang pawh a tel ang.
India-in gin leh whisky a lak luh atanga chhiah lai hi indawrnaa mutan a ni a, a chanve atangin 75%-ah tihhniam tur niin nakum atanga hman tan a ni ang.
UK Business Secretary Jonathan Reynolds chuan UK sumdawng leh mipui tana a hlawkna tur chu a lian dawn hle tih a sawi.
Reynolds-a hi Indian aiawh, Piyush Goyal nen kar hmasa khan inbiain inremna hi an tifel.
British sorkar chuan inremna hi UK-in kum 2020-a European Union a chhuahsan hnua sumdawnna lama ram dang a thawhpui ‘lian ber leh pawimawh ber’ a nih thu a sawi.
Inremnaah hian UK-a visa rei lo chi nena hna thawk Indiante social security kum thum chhung ngaihhnathiam pawh a tel.
India hi reilo teah khawvela economy lian pathumna ni thuai tura ngaih a ni.