UK rela inpawng vihnaah mi 10 hliam, pahnih man

UK rela inpawng vihnaah mi 10 hliam, pahnih man
United Kingdom-a police chuan England khawchhak lam, Cambridgeshire bula rela inpawng vihna thlenga mi 10 vel damdawi in dah an ngaih hnuah a titu nia rinhlelh mi pahnih an man.
British Transport Police-in Pathianni zing hma taka X-a an tar lanah chuan mi pakua vel tuar an awm a, ‘an nunna atana hlauhawm khawp hliam’ an nei niin an sawi.
Firfiaka chetna bik bawhzuitu police-in a chhui hnaah an pui mek tih an sawi a, mipa pahnih man an ni tawh tih an sawi bawk.
Cambridgeshire police pawhin Inrinni zan dar 07:39 (India-a Pathianni zing dar 01:09)-ah kohna an dawng a, relah mi eng emaw zat vih an nih thu an dawng.
“Ralthuam nen officer an thawk chhuak nghal a, rel hi Huntingdon-ah dingin mipa pahnih man an ni,” an ti.
Hemi hma hian East of England Ambulance Service chuan Huntingdon Railway Station-ah an buai hle a, ambulance leh critical care team tirin air ambulance pawh pathum an tirh thu an sawi a. “Hliam tuar eng emaw zat damdawi inah dah an ni,” an ti.
Thil thleng hmutu mipa pakhat chuan chem lian tak keng mipa a hmuh thu The Times chanchinbu hnenah a sawi a, ‘hmun tinah thisen’ a awm thu leh washroom-ah a biruk thu a sawi.
Passenger thenkhat chuan an tlanchhiatna lamah ‘mi dangte an rap nawk nawk’ niin a sawi a, au te nuai nuai pawh a awm tih a sawi.
Mi dang pakhat chuan police-in a titu nia rin pakhat hi taser hmangin an titlu niin Sky News a hrilh.
UK Prime Minister Keir Starmer-a chuan thil thleng chu pawi a tih thu leh a ngaihven hle thu a sawi a. “A tuartute ka tawrhpui a, emergency service-ten rang taka an chhan let avangin a lawmawm hle bawk,” tiin X-ah a tar lang.
UK-a East Coast Mainline service enkawltu, London North Eastern Railway (LNER) pawhin an rel pakhatah hetiang thil a thlen thu leh an rel tlankawng dang zawh pawh an dintir vek thu an sawi.
England khawchhak lam leh Scotland-a rel tlantirtu LNER hian mipuite chu rela chuang rih lo tura chahin ‘eng emaw harsatna’ a awm palh thei tih an sawi.
Sorkarin a chhinchhiahna atanga a lan danin England leh Wales-ah hian kum 2011 atang khan chema mi beihna hi a pung hle.
UK hi khawvela silai thununna khauh berna ram zinga mi a nih laiin chema mi beihna pawh ‘ram pum buaina’ a nih thu Starmer-a chuan a sawi a. A kaihhruai Labour sorkar pawhin tihtawp tumin hma a la nasa.
Sorkarin chema mi beihnaa tihtawp tuma hma a laknaah kum 10 liam ta chhung khan England leh Wales-ah chem 60,000 vel man leh thuneitute hnena hlan a awm niin Nilaini khan Home Office chuan a sawi.
Vantlang hmuna chem ken chu kum li thleng lung in tan theihna a ni a, sorkar chuan chema mi thahna hi nikum khan 18%-in a tlahniam niin an sawi.