Ukraine-a Russia tan sorkara mi pawimawh tak thin that

Ukraine-a Russia tan sorkara mi pawimawh tak thin that
Russian tantu president paih thlak tak hnuaia Ukrainian sorkar mi pawimawh tak ni thin chu Spanish khawpui Madrid-a American sikul tualah kah hlum a ni tih thuneituten an sawi.
Kum 51 mi, Andriy Portnov-a hi Nilainia Pozuelo de Alarcón venga a fate sikul kal a thlah zo sikula lirthei hunna pana a kal lai chu kah a ni.
A kaptu hi mi pakhat nia hriat niin vawi eng emaw zat a kah hnuah a bul park sira thing hmunah a tlanchhe zui nghal niin hmututen an sawi.
Portnov-a hi MP a ni a, kum 2014-a mipuiin nasa taka an nawr hnua paih thlak tak, Russian lam tantu, Viktor Yanukovych-a president-ah khan deputy head a ni thin.
Yulia Tymoshenko-i kaihhruai sorkarah pawh an party atangin MP a lo ni tawh a; mahse, kum 2010 inthlana Yanukovych-a thlan tlin a nih khan a awmna party a sawn a ni.
Ukraine-a revolution a chhuah khan an ram atangin a tlanchhe zui a, kum 2019-a Volodymyr Zelensky-a president-a thlan a nih hnuah chauh a kir leh.
Ukraine hi a chhuahsan leh a, kum 2021 khan US Treasury chuan court rorelna thunun tuma hma a lakna kawngah ‘court thu rem dan tur duangah’ puhin a hrek zui.
Nilaini zing dar 09:15 (India-a chawhnu dar 01:45)-a a fate sikul thlah thah a nih phenah hian tute nge tel tih hriat a la ni lo.
Hmutute chuan vawi nga vawi ruk vel kah a nih thu an sawi a. Zirlai pakhat chuan halpuah puak emaw a tih thu Spanish TV hnenah a sawi a. Hmeichhe pakhatin Portnov-a lam hi panin a te chhuak zui niin El Mundo chanchinbu chuan a tar lang bawk.
Police-in drone leh helicopter hmangin a kaptu hi an zawng zui nghal a. Hmutute chuan cher lampang, tracksuit pawl ha niin an sawi.
Kum 2018 khan tuna mi ang deuh chiaha inkah hlumna hi a thleng tawh a. Colombian ruihhlo tawlhtu pakhat chu Portnov-a thahna atanga hla lem lo tak, British Council sikul tualah kah a lo ni tawh.
Nilainia thil thleng hi a chhan engmah hriat theih a la ni lo va, emergency services chuan Portnov-a hian a lu leh a hnungah silaimu luhna a tuar tih an sawi.
Portnov-a Mercedes car dum chu khawih chet loh turin an dah a, sikul chuan nu leh pate hnenah zirlaite chu an him vek tih an sawi.
Portnov-a hi tun hnaiah Ukraine leh ram pawnah pawh a laka thubuai siamah hnehna a chang deuh zel a. European Union-in an hrekna pawh court-ah khingin a hneh.
Ukraine-a SBU security service pawhin Russia-in an luah, Crimea chungchangah ram phiara cheah an puh a, hetah pawh hian hnehna a chang.