Ukraine hnenah Leopard 2 tank pe ta

Germany chuan Ukraine hnenah a chhuanvawr em em Leopard 2 tank chu a pe tan ta a, a thawhkhatna chuan Ukraine a pan mek niin German defence ministry thuchhuah chuan a tarlang.
Leopard 2 tank pek a nih hma hin Ukrainian crews te chu he tank hman dan hi zirtir hmasak an ni phawt a, a hmasa ber atan he battle tank sawm pariat lai mai chu pek phawt a ni.
Defence Minister Boris Pistorius chuan tanks te chuan indona tualzawlah danglamna nasa tak an siam ngei a bsei thu a sawi zui a.
Hetihlai hian UK-in Challenger 2 tank a pek te pawhin Ukraine an thleng tawh niin report a ni bawk.
Ukraine chuan Russia-in a runna laka a inven leh him theih nan khawthlang ramte hnenah tunlai thiamna hmaga siam ralthuam vehicles leh weapon system tha ber ber te a ngen reng a ni.
Ukrainian sorkar chuan Leopard 2 tank ten an ram a luh thu an la sawi chiang lo va, mahse, UK siam Challenger 2 tank te erawhin an ram a luh tawh thu a sawi chiang thung.
Leopard 2 tank te hi battle tank zingah chuana tha bera ngaih niin European ram Nato member te chuan an kawl deuh vek a, khawvel pumah 2,000 vel a awm anga chhut a ni.
Germany chuan a tirah tank pek hi a hreh hle a, mahse, kumin January thla khan ram dang dang tena tank pek an remtih thu an sawi hnuah remtihna a pe ve ta a ni.
German dan hnuaiah chuan Leopard 2 tank leitu ram te chuan ram dang hnena an tank lei tawh sa te an pe dawn a nih pawhin German remtihna an lak ngei a ngai a, hei vang hian Germany remtihna tello chuan ram dang te pawhin Leopard 2 tank hi Ukraine hnenah an pe ngawt thei lo.
German Defence Minister Boris Pistorius chuan tanks te chu ‘kan tiam ang ngeiin ahun takah kan Ukrainian thian te hnenah hlan a ni’ tiin a sawi.
Tun hnai kar eng emawzah chhung chu Germany chuan Ukrainian tank crew te chu he tank hman dan hi a lo zirtir tawh a. Leopard 2 tank te hi Russia chhuan vawr T-90 battle tank el ber tura ngaih niin Leopard 2 tank te hi tha zawk fe a ngaih a ni bawk.
Leopard 2 mai bakah hian Germany chuan Ukraine hnenah hian ralthuam tha specialist tank-recovery vehicles pahnih leh Marder infantry fighting vehicles 40 a pe tel bawk.