Ukraine-in Russia ram bei zui zel

Ukraine chuan Nilaini (August 14, 2024) khan Russian territory chu nasa zawka beiin Belgorod region border te chu bomb nen a bei a.
Mahse, Ukraine chuan Russian territory an awp mek te chu moscow in ‘inremna’ a duh a nih chuan awp an tum lo va, Russia an beihna pawh tihtawp an remti tur a ni, a ti.
Ukraine forces te chuan kar kalta thawhlehni khan Kursk region lut tawhin World War II hnua foreign army tena Russian leilung an beih nasat ber leh ram lak nasat ber a thleng zui a ni.
President Volodymyr Zelensky pawhin Thawhlehni khan a military chief Oleksandr Syrsky nena video call an neih footage chu tichhuakin chutah chuan Syrsky chuan ‘hmun thenkhatah chuan kan sipai ten kilometer khat atanga kilometer thum vel an thleng tawh’ tiin a sawi.
Tun hnai teah Russia territory 40 square kilometres kan thununna hnuaiah awm tawhin chenna hmun 74 te kan thununna hnuaiah a awm tawh tiin Syrsky chuan a sawi bawk.
Belgorod region-ah state of emergency puan zui niin “Ukrainian Armed Forces tena bomb hmanga min beih reng avangin Belgorod region-in harsatna nasa tak kan tawk mek a. Chenna in tihchhiat a ni a, tualchhung mi thi leh hliam an awm” tiin governor Vyacheslav Gladkov chuan a sawi. Belgorod hi Ukraine Kharkiv region nena inthenawm mai a ni.
Ukraine-in Russia a beih atanga kar khatna Thawhtanni khan Syrsky chuan a sipaite chuan Russian territory 1,000 square kilometres an thunun tawh tiin a lo sawi tawh bawk a.
Kursk regional governor Alexei Smirnov chuan Thawhtanni khan settlement 28 pawh an thuhnuaiah an dah tawh thu sawiin Ukrainian forces te chuan Russian ram chhung 12 kilometres-a thuk an lut tawh a ti bawk.
Institute for the Study of War (IWS) te data AFP tena an zirchiannaah Ukrainian sipaite chuan Thawhtanni thleng khan Russian ram chhung 800 square kilometres an thunun tawh an ti bawk.
Thawhlehni khan US President Joe Biden chuan Ukraine chet dan chuan Russia President Vladimir Putin lu a tihai hle tiin a sawi nghe nghe.
Russia defence ministry chuan Thawhleh ni khan an sipaite chuan Ukrainian sipaite chu an hnawtkir zel tia sawi thungin Ukrainian sipai te chuan mobile group leh armoured vehicles te nen chet an la a ti a.
Hetih lai hian Ukraine foreign ministry thupuangtu Georgiy Tykhy chuan Kyiv chuan Russian territory lak a duh lo tia sawiin mahse Ukraine chet dan chu a tih tur dik tak a ni a ti thung a.
“Russia-in inremna awm se a duh hma poh leh Ukrainian defence forces ten Russia beihna an titawp ang,” tiin a sawi bawk.
Kursk region-ah Russian 120,000 chuang te chuan an chenna in leh lo an chhuahsan tawh a. Ukraine chuan ramri hnaih Sumy region-ah movement restriction a kalpui nghal thu a sawi bawk.
February 2022-a Russia-in Ukraine a run atangin a bik takin chhim lam leh Ukraine khawchhak lam ram zau tak lain Ukrainian khawpuite chu missile leh drone hmangin a bei chamchi bawk.
Ukraine chuan chetlak ngaihna a hre lo va, kum 2022-a Russian forces te a nawr let deuh hlek tih loh chu a hnungtawlh zawng hlirin a kal a ni.
Mahse tuna Kursk region a bei thut chuan Russia a barakhaih hle a, Russia-in Ukraine a run hnua ramri kana Ukraine-in chet a lakna turu ber a ni mek a ni.
Hetih lai hian Ukraine chuan Russian drone kahchhuah 23 zinga 17 an kahhtlak thu sawiin hei bakah hian Russia chuan guided missiles pahnihin a beih thu a sawi bawk.
Drone te hi Kyiv, Kharkiv, Kirovohrad, Cherkasy, Mykolaiv, Sumy, Zhytomyr leh Zaporizhzhia region-ah te kahthlak an ni tiin Ukrainian air force te chuan an sawi a.
Russian Drone kahchhuahte hian northern region Chernihiv leh Zhytomyr-ah infrastructure tichhe thungin Mykolaiv-ah chenna in pahnih tichhiain mahni nunna chan an awm lo thung a. Kyiv governor Ruslan Kravchenko chuan drone chuan ram ngaw tikang bawkin mahse thelh zui a ni, a ti bawk.