Ukraine in Russia runin ram chhung 10km vel lut tawh

Russia military chuan western Kursk region-a an ramri lut Ukrainian sipaite chu nawrlet tumin an bei zel tiin an sawi a. Inbeihna in ni li hmel a hmu tawh bawk.
Russian defence ministry chuan Ukraine chuan sipai 280 chuang darkar 24 chhungin a hloh tawh tiin a sawi a, mahse, chu chu independent a finfiahna erawh a awm lo.
Ukrainian sipai te chuan Russia ram chhung 10km vel lai an lut tawh nia sawi niin February 2022 a Moscow in Kyiv a beih hnua Ukraine in Russia ram chhung a luh thuk ber a ni.
Ukraine chuan ualau takin Russia ram a luh thu a sawi duh lo va. Mahse, President Volodymyr Zelensky chuan Ningani khan Moscow chuan Ukraine a run avanga a nghawng a tawng ve tur a ni a ti.
Ukraine military te chuan a hrana thuchhuah siamin Russia ram chhunga military airfield chu beiin warehouse leh guided bomb te a tihchhiatsak a ti bawk a.
Ukraine ramri atanga 350km laia hlaa awm Lipetsk airfield chu Ukraine in zan lama a beihna avangin a kang nasa hle a ni.
Lipetsk regional authority te chuan state of emergency puang nghalin a chhehvela khua pali a cheng te chu thiarchhuah an ni bawk.
Russian defence ministry chuan thuchhuah an siamah an sipaite chuan Ukrainian armed forces te Russian Federation territory lutte chu an nawrlet tiin an sawi ve thung a.
Hmelma tena Russia ram luh an tum chu aviation leh artillery te hmangin chhanlet an ni a ti bawk.
Thawhlehni khan Russia chuan Kursk region ah ‘federal state of emergency’ lo puang tawhin chu chuan thil awm dan duhawmlohzia a pholang anga ngaih a ni a.
Russia chuan Thawhlehni zing atang khan Ukrainian sipai 1,000 vel leh tank leh armoured vehicle te chuan Russia ram chhung an lut tan tiin a sawi.
“Russia in kan ram leilungah indona a thlen a, an thiltih ang chu an tawng ve tur a ni” tiin Zelensky chuan a sawi.