Ukraine-in Russian submarine Rostov-on-Don tihchhiatsak

Ukraine military-te chuan Criimean peninsula-a Russian submarine chawl lai chu a tihpil thu a puang.
Rostov-on-Don chu kili-class attack subamraine niin kum 2014-a hman tan niin Sevastepol port city-a a awm laiin missile hmanga beih niin a pil zui tiin Ukraine general staff chuan thuchhuah a siamah a tarlang.
Rostov-on-Don hi Russia Black Sea fleet zinga Kalibr cruise missile kapchhuak thei submarine pali zinga pakhat a ni bawk a. Russian defence ministry chuan engmah sawi a la nei lo thung.
Kyiv officials te chuan Crimean peninsula vengtu a dah Russian S-400 air defence system pali a tichhe tel bawk tiin a tarlang bawk. Russia hian Crimea hi kum 2014 khan run thutin a awp zui ta char char a ni.
Nikum September thla khan UK intelligence officials te chuan Rostov-on-Don chuan chhiatna neiin Sevastepol shipyard ah siam thatin a awm mek, an lo ti tawh bawk a.
Ukraine military te chuan Russia chu a submarine chu siam thain tun hnai lawkah pawh Sevastepol hnaihah enchinna a nei tiin a sawi a. He submarine hi $300 million man hu nia sawi a ni bawk.
“Rostov-on-Don tihchhiat hian Black Sea a Ukrainian territorial water ah Russian fleet te tan hmun him a awm lo tih a tarlang,” tiin Kyiv chuan thuchhuah siamin a tarlang.
Tun hnaiah Sevastepol a Russian naval forces te chuan beih tawk fo in March thla chhung ringawt khan Ukraine chuan he port city a landing ship pahnih leh patrol vessel te a lo tichhe tawh bawk.
February 2022 khan Russia chuan Ukraine run thutin khata tang khan naval lamah a hnungtawlh nasa hle tawh a. Ukraine chuan Russian warship 15 a tihpil tawh thu sawiin chung zingah chuan Black Sea fleet flagship Moskva pawh a tel a ti.
Kar kalta khan Ukraine military-te chuan Moscow chuan Sea of Azov, Black Sea nena inzawmna neia a naval assets te chu loh theih loh vangin a saseng hlawm tiin a sawi tawh bawk.
Tun hnai lawkah pawh Russian internal security service FSB te chuan Ukraine-in a aircraft carrier kum 2018 atanga repair tawh Admiral Kuznetsov tihpil a tum chu a titlawlh tiin a sawi bawk a.
Hetih lai hian Kyiv a official te chuan Ukrainian drones te chuan Russia major airfield leh oil depot te chu an thlurbing tiin an sawi bawk a.
Online footatage tihchhuah pakhatah pawh fuel emaw ammunition depot chu drone hmanga beih a nih hnuah kangmei nasa taka a chhuak zui lai tarlan a ni a. Russia chuan Ukrainian drone tam tak chu an kahhtlak thu a sawi chungin local authority te chuan air base kaihhnawihah state of emergency an puang tho a ni.
Tun hnaiah Russia chuan Ukraine a beih ni na zual bawkin guided air bomb 600 chuangin Ukraine a kap tiin Ukranian President Volodymyr Zelensky chuan a sawi a.
Ukraine tan Russian aircraft te danchah chu tihmakmawh a nih avangin Ukraine-in Russian airfield te a bei chu a tihtur ngawih ngawih a ni a ti bawk.
Ukraine allies te chuan an ralthuam pek hmanga Ukraine-in Russia ram chhung a beih chu a hmain an remti lo va. Mahse, tun hnaiah US chuan ramri hnaiha Russia hmun te beih remtihna Kyiv a pe ta thung a ni.
Kar kalta khan Lithuania foreign minister chuan Ukraine hnena F-16 pek hmasak ber te chuan Ukraine an thleng tawh tiin a sawi a. Ukrainian President Zelensky chuan F-16 te chu an ram air defence plan a tana a lailum luahtu tiin a sawi.