Ukraine indo thu-ah US-in Russia lam a tang

Ukraine indo thu-ah US-in Russia lam a tang
Russia-in Ukraine a rûn atanga kum thum a liam mek laiin UN thutkhawma vote laknaah US chu vawi hnih ngawt Moscow thlawp lamah a tang a, hei hian indona kal meka Trump-a sorkar ngaihdan a inthlak hle tih a tilanga ngaih a ni.
European-ten Moscow-in Ukraine a beih demna resolution an put luh kalh zawngin US hian vote a thlak a, New York-a UN General Assembly (UNGA)-ah hian hei hi a tlang ta tho.
A hnuah UN Security Council-in Russia demna sawi lang tel lova indo titawp tura ngenna chhuah tur reslution chu US hian a put lut bawk.
Security Council resolution hi pawm a ni a; mahse, US thawhpui lian pahnih, UK leh France chu an hai a, a thu chu thlak danglam deuh an duh bawk.
Resolution-te hi French President Emmanuel Macron-a’n an inhriat thiam lohnate sawi dun tura White House-a President Donald Trump tlawh mek laia put luh a ni.
Ningani hian British Prime Minister Sir Keir Starmer pawhin American hruaitu thar hi tlawh a tum bawk.
Trump-a sorkar hian a thawhpui thin a thlak mek a, hun rei tak Europe himna atana hma lo la tawh thin a nih laiin tun hnaiah Moscow lam a hawi mek.
Member 193 awmna UNGA hi Thawhtanni khan thukhawmin US palaite chuan ‘Russia-Ukraine buaina’ avangin thi an tam tawh lutuk a, indo tihtawp thuai a ngai niin an sawi.
European palaite hian Russia-in a rûn avanga demna thu an pho lang ve thung a, Ukraine-in inrelbawl hranna a neih leh ram khat a nihna chu an thlawp ve thung.
“Hetianga inrûn leh inbeih hi kan dem ngei tur a ni a, kan fak tur a ni lo,” tiin Ukrainian Deputy Foreign Minister Mariana Betsa chuan a sawi.
UNGA member-te hian European resolution hi thlawpin vote lakah 93 an hmu a, US hian a duh lo zawngin Russia, Israel, North Korea, Sudan, Belarus, Hungary leh member dang 11 nen an phar a, hai 65 an awm bawk.
UNGA hian US resolution pawh hi a pawm tho va; mahse, a thu tidanglam hretin Ukraine thlawpna thu an telh a, US a hai ve thung.
Thuneitu sang zawk, member 15 chauh awmna, UN Security Council chuan US resolution hi tidanglam lovin vote 10 hmuin an tlangtir thung a. Hetah hian UK, France, Denmark, Greece leh Slovenia an hai.
US hian an thawhpui kumhlun, European-te hi a do khât hle.
Russia-in kum thum liam taa Ukraine a rûn hnuah Security Council-ah pawh inpawhna a nasa hle thin a, permanent member panga chauh an nih avangin a veto hmangin anmahni demna ang chi chu a paih thla hmak zel.
Hei vang hian sawihona lian ber chu UNGA a ni a; mahse, heta thutlukna siamte hi dan ang takin an member ramin an kalpui zel tur tihna a ni lo va, Security Council nen an thuneihna a insan hleih hle.