Ukraine indo tihtawpna tur point pali duang

Ukraine indo tihtawpna tur point pali duang
UK Prime Minister Keir Starmer chuan Ukraine-a indona a tawp theihna tur point pali an ruahman a puang a, Russia laka invenna tur ruahmanna a tel bawk.
UK, France leh ram dangten ‘thawhho remtihna’ siamin hetah hian Ukraine thlawp zawnga US a tel ve theihna tur pawh an ngaihtuah dawn tih a sawi.
“Vawiin hian khawvel chanchinah ramri kan thleng a ni,” tiin Starmer-a chuan Pathiannia London-a ram 18 hruaitu intawh khawm zawhah a sawi a. Intawh khawma tel hi Europe an ni deuh ber a, an zingah Ukrainian President Volodymyr Zelensky pawh a tel.
Zirtawpni maiah khan Ukrainian hruaitu leh US President Donald Trump-a chu White House-ah an lo inhnial chiam tawh a ni.
“Europe nen tangrualin America thawhpuia muanna leh himna a awm theih dan turin kan kal dawn a ni,” tiin Zelensky hian a sawi.
An thutkhawm zawha thuthar lakhawmtute a kawmnaah Starmer-a chuan hma an lakna tur point li a puang.
Ukraine-ah sipai tihchakna tur an thawn lut zel ang a, Russia chu eibar lamah na zawkin an nawr bawk ang.
Muanna an siam tum chuan Ukraine-in ram hran nihna a neih humin himna tluantling a awmtirtur a ni a, muanna tura inbiakna apiangah Ukraine a tel ve zel bawk ang.
Muanna inremnaah Ukraine chu nakin zela rûn a tawh pawha lo dan kir theihna a neih nan invenna tha tawk pek a ni ang.
‘Thawhho inremna’ siamin Ukraine chu chhan a ni ang a, a hnu zela muanna a awmna turin an bei ang.
Sir Keir-a hian air defence missile lei nan £ tluklehdingawn 1.6 a pek belh tur thu a puang bawk a. Hei hian a hmaa £ tlinglehdingawn 2.2 puktir a tum a belhchhah dawn a, sum puk hi Russian bungrua khawih theih lohva an tih mek hmanga rulh tur a ni.
“Hun kal tawha kan tihsualah kan zir tawh a, awlsam taka Russia-in a bawhchhiat theih kan siam tawh dawn lo va, inremna chu chak tak a ni tawh ang,” a ti bawk.
Prime minister hian thawhhona siam turte hi eng ram nge tih a sawi lo.
“Europe hi lian takin a che dawn,” a ti a. Inremna a awm hma hian US puihna mamawh a nih thu leh Russia pawh telh a ni dawn tih a sawi a; mahse, Moscow hian a duh ang em hriat a ni lo.
“Trump-a nena kan remna kan neih thuai hi a pawimawh tih kan hre vek a, kan tihpuitlin thuai a ngai a ni,” tiin a sawi.
Trump-a kaihhruai US chu thawhpui rintlak a ni dawn em tih zawhna chu, “Tute mahin Zirtawpnia thil thleng kha kan duh lo va; mahse, US hi thawhpui rintlak loh niin kan ngai lo,” a ti.
London-a intawh khawmah hian France, Poland, Sweden, Turkey, Norway, Czech Republic, Denmark, Germany, Netherlands, Romania, Finland, Italy, Spain leh Canada an tel.
Kar liam ta kha palai hna thawhna pawimawh tak takin hman niin Pathiannia intawh khawm hian khar a ni a. Washington chu French President Emmanuel Macron, Sir Keir leh Zelensky ten an tlawh.
Zelensky-a’n a tlawh tum hian Trump leh US Vice-President JD Vance nen inhnialin US president hian Ukrainian hruaitu hi ‘Indopui III-na tichhuak thei’ ang hialin a chhuah.
Trump-a hian Ukraine indo tihtawp a duh thu leh Russian President Vladimir Putin-ah rinna a nghah ngam thu a sawi a, hei hi khawthlanga a thawhpui tam tak ngaihdan nen a inang lo.
US hian Ukraine tel lovin Russia nen inremna a awm theih nan inbiak a kalpui tan tawh nghe nghe.
US hruaitu hian Ukraine chu indo tichhuaktu angin a lo sawi tawh bawk a, Putin-a hi February, 2022 atanga a thenawm ram rûntu tih chu mi tam zawk ngaihdan a ni thung.