Ukraine indona avangin naupang sang hnih chuang thi leh hliam awm tawh : UNICEF

Ukraine indona avangin naupang sang hnih chuang thi leh hliam awm tawh : UNICEF
Ukraine leh Russia indonain ni sang khat dawn a awh hnuah hemi hun chhung hian naupang sang hnih chuang thi leh hliam an awm tawh niin UNICEF chuan a sawi.
UNICEF report-a a lan danin hemi chhung hian naupang 659 in nunna chan tawhin, hliam tuar 1,747 an awm tawh a, chawhrualin kartin naupang 16 tal thi ang a nih thu sawiin, indona hi a la reh fel theih loh avangin naupang maktaduai tam tak chu nunna chan thei dinhmunah an ding reng niin a sawi bawk.
Indona mai bakah naupangte chuan an awm hmun sawn a ngaih thin avangin tui thianghlim, electric leh thil tul dang mamawhte indaih lohna an nei nasa hle niin sawi a ni a, indona avang hian Ukraine mipuite chuan hmalam pana kal an harsat hle niin sawi a ni.
UNICEF executive director Catherine Russell chuan naupangte chunga thil thleng thin chu ngaihzam chi a ni lo nia sawiin, thil pawi tawpkhawk a nih thu a sawi a, naupangte chu an inkhelhna hmunah te, an mut hmunah te an thi a, an lainatawm tak zet niin a sawi bawk.
Ukraine rama naupangte dinhmun chu thil thleng duhawm lo tak a ni tia sawiin, fahrah tam tak an awm phah a, naupangte chan chu thim chhah tak a ni mek niin Russell chuan a sawi a ni.